April 13: Mangihutkon Rosuhta atap Rosuh-Ni?

 

Hosanna! Horas ma na roh marhitei goran ni Tuhan. (Johannes 12: 13)

(Terjemahan baru, LAI 1971, “Hosianna! Pinasu-pasu ma na roh marhitei goran ni Tuhan in.)

Gok malas ni uhur banggal do na mabuei in mangidah Tuhan Jesus roh hu huta Jerusalem mangajak halode. Songon raja ni Israel do Ia idahon. Ibotoh sidea do la ma na sinuruh ni Naibata mambahen halongangan. Naibata do Ia. Ai ma ase marolob-olob na mabuei in mandilohon: Hosanna! Horas ma na roh marhitei goran ni Tuhan!”

Tapi Tuhan Jesus seng megah Ia, tapi pusok do uhurni halani seng iarti bangsa in Ia. Roh do Ia bani sidea pamalum naborit partonduyon ni sidea, tapi seng ijalo sidea partolonganni. Anggo sidea pasal parangkulaon do sihol tolongan ni Tuhan Jesus sidea ninuhurni. Sihol sidea gabe raja Tuhan Jesus, sihol gabe raja Ia na boi paluahkon sidea humbani panjajahan Roma.

Tapi Tuhan Jesus sedo raja sisonai, raja ni partonduyon do. Halani ai ma ase podas do margoling uhur ni sidea dompak Tuhan Jesus gabe isurakkon sidea use: Parsilangkon ma Ia! Parsilangkon ma Ia!

Sonari mangkawah ma hita hubagas uhurta, atap na songon halak ai do hita? Sonaha do pangarusionmu pasal Tuhan Jesus? Tongon do Raja Ia, na markuasa paluahkon hita ase mardeka hita humbani panjajahan ni dousa pakon sibolis. Tarpamalum Tuhan Jesus do sagala naborit ni tonduyta.

Ibalosi Tuhan Jesus do pangindoanta pasal partonduyonta, ase marmalas ni uhur hita, janah boi marsurak: “Hosanna! Horas ma na roh marhitei goran ni Tuhan!”

Tapi Raja harosuhmu ai sedo mansuhuni rosuhmu pasal materi (na taridah). Tapi Rajamu ai, sibalosanmu janah siidanganmu do ibagas malas ni uhur. Jalo ham ma Ia ibagas malas ni uhur janah ihutkon ham ma Ia ibagas bujur ni uhur.

 

Ham Tuhan Jesus! Ajari Ham ma hanami ase boi humbani putih ni uhumami mangkatahon: Hosanna! Horas ma na roh in marhitei goran ni Tuhan. Amen.

Haleluya No. 30 : 3, 7. Hosianna Anak ni >>
3. Hosianna! Raja ni na mardamei, Jagoraha!
Ganup binoban-Mu in, damei, sonang na maharga.
Hanai hinopkop-Mu in do simada ganup in.
7. Hosianna! Anak ni Naibata na jadi jolma.
Tohu ma Kuria in, ase sai tongtong martuah.
Sangap bai goran-Mu in, sadokah-dokahni in.