April 2: “Pasal ham do deba ase pala tarsilang Ia”.

tnt_april2_ill.jpg

 

 

Malele jam pasiahkon mandoruh ma Jesus maling, nini ma: “Eli, Eli lama sabachtani”, artini : “Naibatangku, Naibatangku, mase itadingkon ham Ahu ?” (Mateus 27:46)

Humbani jam paonomkon das bani jam pasiahkon (jam 12 das jam 15) golap ma i tanoh on. Ibagas panorang ai ma tang na parahni sitaronon ni Tuhan Jesus ibagas paruntolonni, Jesus Anak sasada ni Naibata, pala iahap itadingkon Naibata Ia. Jesus na so ongga mardousa manaron uhuman pasal dousa. Domma tampei bani Tuhan Jesus ringis ni Naibata, halani dousa. Ijai ma idorakkon hata ai: “Naibatangku, Naibatangku, mase itadingkon Ham Ahu ?”

Pandorakon ibagas paruntolon na parah on, songon na itupuk uhurta. Ai ma na mamaksa hita porsaya bani Tuhan Jesus pakon marholong ni uhur Bani. Ai itaron pe haganupan ai sinuruh ni holong ni uhur-Ni do. Jesus manaron halani ham pakon ahu, halani hita.

Pingkirhon hita lobei bagas pasal ai. Itaron pe ai dihut do halani dousamu. Pasal ham do deba ase pala tarsilang Ia.

Sonaha, lape sihol roh ham hubani Jesus ase maluah ham humbani dousamu? Nasiam hasoman! Hita haganup do hita mambotoh: Na manaron na marsik do Tuhan Jesus janah matei marsik bani hayu parsilang manggalar utang dousanta, naija ope na hurang? Lang ope ganup uhurta mangkatahon pakon mangakuhon ibagas uhurta: Sintong do sonai? Ugamanta sedo ugama habotohon, tapi ugama pangahap do.

 

Ham Tuhan Jesus! Paahapkon Ham ma sagala sitarononmu, hanami hinan do patut manaron ai, ai itaron Ham do ai halani dousanami. Urupi Ham ma hanami mangkaporsayai humbani putih ni uhurnami pangkopkop-Mu ai bannami. Amen.

Haleluya No. 61: 3, 6. O, Ulu na sab daroh >>

3. Au on talup, o Tuhan manaron sisonin
Dousangku do iporsan Ham na tarsilang in
Sai tonggor Ham, o Tuhan, au na ilobei-Mu
Anjaha patuduhkon hu bangku layak-Mu
6.Tarima kasih ningku Bamu, ale Tuhan.
Parmatei-Mu, Tuhanku mambaen au sonang.
Ai daroh-Mu madurus, halani dousangkin.
Sai jalo au o Jesus, bani parmateihin.