April 27: “Damei ma Bennima”

tnt_april27_joh20_19_damei

 

Damei ma bannima!” (Johannes 20 : 19)

Domma dokah rap Tuhan Jesus pakon susiani, pala tolu tahun. Holong do ateini bani sidea, lambin iguruhon sidea mangkaholongisi, lambin holong ma uhur ni sidea bani Tuhan Jesus. Lambin porsaya ma sidea Jesus on ma Kristus na pinarbagah ni Naibata, Anak ni Naibata, do Ia. Ididah sidea halongangan binahen-Ni, ibogei tong podah-Ni. Tapi bani ari Kamis pakon Jumahat parmatei ni Tuhan Jesus roh ma bani sidea parlajoan na parah. Lintun ma sidea manadingkon Tuhan Jesus. Songon na lupa ma sidea pasal haporsayaon ni sidea bani Tuhan Jesus. Sedo gakni na tongon Anak ni Naibata; sedo gakni na tongon Ia Sipaluah hita? Jadi gok pusok ni uhur ma sidea.

Roh ma Naibata mangurupi sidea, ai roh ma Tuhan Jesus, dob puho Ia humbani na matei mangayaki sidea na gok pusok uhur, gabe maidop ma uhur-Ni jongjong ma Ia itongah-tongah ni sidea anjaha ihatahon:, “Damei ma bannima!” Tapi mabiar do hansa susian ai, lape porsaya. Gabe ipatuduhkon Tuhan Jesus ma tanganni pakon naheini. Janah ipatorang bani sidea aha na tarsurat pasal-Si. Dob ai manombah ma sidea janah porsaya bani Tuhan Jesus.

Buei do susian ni Tuhan Jesus nuan on (Kristen) na magoan Jesus, na magoan Sipaluah. Jadi tongon roh ma bagei-bagei ni pusok ni uhur. Anggo masa sonai bamu, pindo ham ma Tonduy ni Naibata patorangkon bamu pasal Jesus Sipaluah ai. Pos ma uhurmu roh do Jesus mangkatahon bamu: “Damei ma bannima!”.

Mardamei, mardear do ai. Anggo damei ma ibere bani susian ai, artini lang be sidea sirang humbani Naibata lang be sirang humbani Tuhan Jesus, mardomu ma use, mardamei ma. Anggo domma damei, domma jorei seng dong na lutu be. Lang dong parsalisian be. Salosei ganupan.

 

Ham Tuhan Jesus! Ulang tadingkon Ham ahu ulang igoki pusok ni uhur ahu. Totap ma hasomani Ham ahu ase marmalas ni uhur ahu janah mardamei. Amen.

Haleluya No. 19 : 1, 2: Damei do Nimu Bereon

1. Damei do nimu bereon, Jesus bani bangsa-Mu,
Tonduy-Mu do pasaudkon, hata bai jabolon-Mu,
Na doyuk janah masombuh, au seng patut rongkon Ham
Tonduy Na Pansing ma suruh ‘se gogoh manombah Ham.
2. Ale Tonduy Sipardamei sai masuki hanai on.
Sai pasada uhurnami, ‘se marbuah ganup on.
Sai tangima pinggol nami lao manangar ojur-Mu;
Ase tambah ringgas nami pararatkon hata- Mu.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s