April 5: Domma iahap ham paboa Anak ni Naibata do Jesus, Sipaluah ham?

tnt_april3_christ-cross-death

 

Jadi ihatahon malim bolon ai ma dompak-Si: Hupabija ma ham bani Naibata na manggoluh, ase patugah Ham bannami atap na tongon do ham Anak ni Naibata! Jadi nini Jesus ma dompaksi: tongon do songon nidokmu ai (Mateus 26:63b-64a)

(Terjemahan baru, LAI 1976, “Dob ai nini sintua ni malim ai ma hu-Bani: Hupabija ma Ho bani Naibata na manggoluh in, ase ipatugah Ho bennami, barang na tongon do Ho Kristus, Anak ni Naibata! Nini Jesus ma hubani: Songon na hinatahonmu ai ma tongon!”)

Aha do tang halani ase sogam tumang uhur ni malim age simbuei ase iparsilangkon Tuhan Jesus?

Tang sogam ni uhur ni sidea halani Anak ni Naibata do Jesus nini, ai do. Maronjolan do Ia bani hasintongan. Seng ongga dong hatani na lepak, ase boi Ia hona pakara. Itahihon sidea pe saksi palsu, seng mardomu hatorangan ni sidea. Gabe ionjolhon janah iongon sidea ma “Anak ni Naibata do Ia nini”. Ai ma dalanni ase isurak-surakkon halak na mabuei in “Parsilangkon ma Ia !” Ai ma na masa ilobei ni malim bolon Kayapas.

Dob salpu ai laho ma bani Panguhum (Gubernur) Latus. Anggo ijai legan ma hata ni sidea: “Jumpah hanami do Ia pabalikkon uhur ni bangsa on janah ilarang do mambere balasting bani kesar, janah ihatahon Kristus do Ia janah raja. Tapi dob ipareksa si Latus, sonon do nini: “Seng dong jumpah ahu salah ni namorah on. Ninuhurhu nalonsingi ma Ia dob ai napaluah!” Dob ai ihatahon malim ai ma use: Ibahen do Ia gabe Anak ni Naibata. Gomos ma ihatahon: Parsilangkon ma Ia, Parsilangkon ma Ia. Sonai ma homa isurakkon jolma na mabuei in.

Ase sasintongni ase iparsilangkon pe Tuhan Jesus, halani ihatahon do Ia Anak ni Naibata. Domma iahap ham paboa Anak ni Naibata do Jesus, Sipaluah ham, sitobus ham humbani dousamu?

Pangahap na sonai ai ma na porlu banta. Halani ai ma homa ase matei tarsilang Tuhanta satimbang badanta hita pardousa on, ase maluah hita.

 

Ham Tuhan Jesus! Suruh Ham ma hu bangku Tonduymu na Pansing in, ase iakuhon uhurnami: Ham do Kristus Anak ni Naibata na manggoluh in. Amen.

Haleluya No. 28: 1, 2, 5: Naha ma Panjalongku >>
1. Naha ma panjalongku, Bamu o Tuhankin?
Naha panjumpahkonku, Bamu o Rajangkin?
Sondangi Ham uhurhu, na golap na bodoh
Ai sihol bahenonku do hamegahon-Mu
2. Ganupan par-Sion-Mu do mangolobkon Ham
Sonin homa uhurhu lao mangayaki Ham
Na megah do uhurhu mamuji goran-Mu
Bujur sura-surangku pasaudkon rosuh-Mu
5. Ai na tarsangkut ahu, Ham mananggali ahu
Bai na tartutup ahu, Ham paluahkon au
Ham do na pasangapkon na madorun hinan
Ham do na pabayakkon na masombuh hinan

Advertisements