April 6: Unduk bani sura-sura ni Naibata

 

tnt_april6_MARY-Bartolome_Esteban_Murillo_The_Annunciation_400

 

Nini si Maria ma : Jabolon ni Naibata do ahu, andohar saud ma bangku hinatahonmu ai (Lukas 1: 38)

Majangin janah mabiar do si Maria mambogei hata ni malekat ai, Ia hape gabe inang ni anak ni Naibata. Tapi halani iahap tonah ai roh humbani Naibata do, gabe ibaloskon ma: “Jabolon ni Naibata do ahu andohar saud ma bangku hinatahonmu ai”.

Unduk do ia bani sura-sura ni Naibata, age pe banggaltu ai namin siat hubagas haporsayaonni. Tapi iahap homa urupan ni Naibata do ia pasaudkon harosuhni.

Dob sonai uhurni gok malas niuhur ma ia, idanganni ma Naibata, gabe inang ni Anak ni Naibata ma ia hape. Tapi malas ni uhurni ai seng torus. Dob tubuh Tuhan Jesus tarpaksa pindah hu Masir ihatahon Naibata, ulang ibunuh Raja Herodes dakdanak in (Tuhan Jesus). Sanggah marumur 12 tahun `Tuhan Jesus, magouan sidea i Jerusalem, pusok uhurni pakon si Yosep. Tapi tang siparahan, ai ma bani ari Jumahat sanggah tarsilang Tuhan Jesus, ipaidah-idah. Tapi sai idalankon si Maria do na romban hubani harosuh ni Naibata, seng lupa ia bani hata tabi ni malekat ai: Horas ma ham na dapotan idop ni uhur! Ihasomani Tuhan ma ham!

Porlu homa paputusonta: Ase Naibata sibalosanta (siidanganta) songon si Maria ai. Tenger ma uhurmu, gabe marmalas ni uhur do ham anggo Naibata sibalosanmu ronsi matei ham.

Age pe sonai dong do pusok ni uhur ibagas goluh on, songon na taridah bani si Maria ai. Tapi na porlu do ai ninuhur ni Naibata. Tapi ningon unduk hita bani sagala pinaporsankon ni Naibata banta.

Dong pe uhurmu sihol mardalan mangihutkon dalanmu sandiri? Sai iurupi Naibata ma hita mandalankon harosuhni.

 

Ham Tuhan Naibata! Sihol balosanku do Ham, sihol idanganku do Ham! Sai urupi Ham ma ahu ase boi hubalosi Ham, ase boi huidangi Ham hunjon hujanan. Amen.

Haleluya No. 6: 1,2, 4, 5. Ham do Ipuji Uhurhon >>
1. Ham do ipuji uhurhon Jahowa Tuhankin
Huambilankon do tongtong, ganup binaen-Mu in
2. Hubotoh Ham do bona ni na dear haganup
Ibere Ham buei hunjin bannami haganup
4. Ai Ham do na margogoh in, sitompa haganup:
Ham do na pagoluhkon in, marmuduhon ganup.
5. Bai langit na marganjang in, na herbang songon kaen
Marribu-ribu bintang in, tor ise ma mambaen?