13 Desember: Mangahapkon Hasombuhon ni Tonduy

tnt_des13_roh bani jesus.jpg

 

Anjaha bani halak na masombuh iambilankon do Ambilan na Madear. (Mateus 11: 5b)

Ai ma sabagian horja ni Tuhan Jesus na dob ihatahon nabi: mamboan ambilan na madear bani na masombuh, mamboan panorang malas ni uhur bani na masombuh. Na porlu banta mangahapkon hinasombuhta pasal tonduyta. Porlu ibotoh hita Tuhan Jesus na dob manggalangkon dirini ase mardamei hita pakon Naibata, ase bayak hita bani Naibata, marhitei Tuhan Jesus Sipaluah ai. Ra do Ia mangurupi hita ase masuk hita hu harajaon ni Naibata.

Arti ni na masombuh hinatahon ni Tuhan Jesus ijon, ai ma na mangahap na lumei do goluh on, seng marisi, seng dong malas ni uhur na sintong ijon. Seng dong siaraponkon bani ujung ni goluh on. Boi do namin ibere dunia on, duit, hahormaton, rumah, kobun, pangkat, tapi ganupan ai boi do misir patar, aha pe lang tading. Aha do na boi soh, tading? Aha pe lang. Saduhun seng dong.

Aha do na tading bamu anggo matei ham? Aha pe lang humbani arta dunia on na boi pamalas uhurmu anggo laho matei ham. Aha pe lang na tarboan ham hun dunia on hu hamatean ai. Tapi anggo iahap ham hahuranganmu, hasombuhonmu, hasombuhon ni tonduymu, iapoh ambilan na madear ai ma ham, na patugahkon holong ni atei ni Naibata marhitei Tuhan Jesus Kristus na dob mangkopkop hita janah manggalar utang dousanta.

Ai ma ambilan ma madear ai. Halani ai roh ma ham bani Tuhan Jesus marhitei tonggomu, basai ham ma pargoluhon-Ni, bogei ham Hatani, podah-Ni sanggah i dunia on Ia ijia. Porsaya ma ham Bani. Bahen ham ma Ia manggoki uhurmu. Ulang be ipaturut ham na i dunia on hansa mangisi uhurmu, na gati mamboan pusok ni uhur banta.

Anggo roh hita bani Tuhan Jesus boi do hita marrupei bani malas ni uhur pakon damei. Palumei ham ma uhurmu humbani uhur dunia on, ase siat ambilan na madear ni Tuhan Jesus ai, ai ma holong ni atei ni Naibata banta marhitei Tuhan Jesus Kristus.
Ham Tuhan Jesus! Tarima kasih ma Bamu halani idop ni uhurmu, na mamboan ambilan na madear ai bannami na marsombuhan on. Amen.

Haleluya No. 133: 1, 5, 7: Holong do Atei >>
1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.
5. Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.
7. Hagoluhanku tongtong Hata-Ni,
sombuh horahku binaen ni in.
Ai do ‘se ningku tong:
Holong do atei ni Naibatangku mangidah au.

Advertisements