16 Desember: Ase Pitah Haporsayaonta

 

tnt_des16
Hundul ma ia songon sipanlala ampa sipapitah pirak, jadi urasanni ma halak Levi, anjaha papitahonni ma sidea songon omas ampa pirak, ase boi sidea mamboban galangan na sintong bani Jahowa. (Maleaki 3: 3)

Anggo mangkawah halak Kristen bani pingkiranni sandiri janah ipatidak pingkiranni ilobei ni Naibata, buei do na jahat ibagas uhurni. Boi do songon na bujur ia ididah hasoman, tapi ibagas uhurni buei do na jahat na so ididah hasoman. Ia anak Levi ilobur janah ianei Naibata do, ase pitah, ase dapot mamboan galangan bani Jahowa.

Hita pe ma ningon dapot do mamboan galangan bani Jahowa. Halani ai maningon ianei do hita marhitei bagei hasunsahan janah iburihi hita marhitei daroh ni Tuhan Jesus Kristus, ase dapot hita mamboan galanganta (tonggonta pakon banggal ni uhurta) bani Naibata. Hatani pakon Tonduyni do ari-ari manguras hita, sonai homa marhitei bagei sitaronon na roh hu banta.

Itanda ham do horja ni Naibata laho pasirsir ham laho mandohorisi? Iahap ham do roh Naibata manganei ham, manlobur ham ari-ari? Ase boi gabe omas pitah atap pirak pitah niaeni ai, maningon ilobur do, ipamilas ronsi malala, dob sonai pe ase sirang sagala sadurni gabe pitah ma, omas pitah atap pirak pitah, ai ma nianei ai.

Bani panorang na milas atap na mohop ai, porlu ipaturut hita. Marhorja Naibata ibagas uhurta, laho paborsihkon uhurta. Ipaturut ham do marhorja Naibata ibagas uhurmu marhitei Hatani pakon Tonduyni?

Domma ihagigihon ham tasik ni uhurmu, dousa ai, na hinarosuhkonmu sapari? Sihol do uhur ni Tuhan Jesus paborsihkon hita, ase songon omas pitah haporsayaonta hu Bani pakon bani Naibata. Inunut do marhorja laho patorsa uhurta.

Paturut ham ma ituhangi itopai Naibata uhurmu, ase gabe songon nianei, seng dong be sadurni, ai ma tenger ni uhurmu bani na legan, bulat bani Naibata mando.
Ham Tuhan Jesus! Uras Ham ma diringku marhitei darohmu, na madurus mangkopkop ahu, ase pitah songon nianei haporsayaonku. Amen.

Haleluya No. 149: 1: Ham Sipagoluh Au >>
1. Ham Sipagoluh au parayak Ham au on.
Sai ulang Ham mandaoh humbagas uhurhon.
Roh Sipagoluh roh tongon, baen Ham au Anak-Mu tongon
Bani daroh-Mu usah au, putih songon bunga ma au
Putih tongon, putih tongon,
bani daroh-Mu usah au, putih songon bunga ma au.

Advertisements