17 Desember: Arti ni Hamubahon ni Uhur

tnt_des17_hamubahonniuhur

 

Jadi laho ma ia hu sab nagori na bani bah Jordan, anjaha iambilankon ma Ambilan hamubahon ni uhur, laho pasasapkon dousa. (Lukas 3: 3)

Ambilan ni si Johannes pandidi ai ma ambilan pasal hamubahon ni uhur. Sedo hamubahon pasal sada-sada dousa, hamubahon ni uhur ganupan do. Humbani na mansuhuni pangindoan ni daging hubani na mansuhuni pangindoan ni Naibata, mandalankon harosuh ni Naibata. lbotoh ma seng na tarombou hagoluhan magira ai, sibere-bere ni Naibata do hansa. Sapari mangunsandei bani dirini sonari mangunsandei bani Naibata mando.

Hamubahon ni uhur, ai ma pargolingan ni dompak ni uhur. Sapari dompak dirini pakon dompak dunia on uhurni, dob mubah gabe dompak Naibata ampa dompak harosuh ni uhumi.

Sapari uhurni sungkunonni, dob mubah gabe Naibata ma sisungkunonni. Sapari arta pakon uhur dunia on mangatur goluhni, dob mubah gabe Naibata ma mangatur goluhni, dob mubah gabe Naibata ma ia. Naibata ma pangguruan ni langkahni.

Si Johannes Pandidi mangambilankon paubah nasiam ma uhur nasiam ai domma dohor harajaon Nagoriatas. Tuhan Jesus pe sonai do ambilanni dob ipungkah marambilan. (Mat. 3 : 2; 4 : 17).

Ase horja na paubah uhur ai iondoskon do ai gabe boronganta marsasahalak. Seng ihatahon: Hupaubah pe uhurnima. Ase maningon marbois gogoh do hita maruntol laho paubah uhur ai. Horjanta do ai.

Dob iahap hita hagalekonta pasal ai mangindo gogoh ma hita, sai urupan ni Tuhanta do hita paubah uhurta ai. Tapi maningon maruntol do hita janah marbois gogoh laho paubah uhurta, ijai pe ase roh pangurupi ni Tuhanta banta. Pindoonta ma irik hasasapan ni dousanta humbani Naibata, ai doma itagang ai marhitei parmatei ni Anakni Tuhan Jesus Kristus mangkopkop hita. Pandidionta do na songon jaminan ni ai.

 

Tarima kasih ma Bamu Tuhan, ai das hu bannami ambilan pasal hamubahon ni uhur on. Urupi Ham ma hanami paubahkon uhurnami. Sapari itundalhon hanami do Ham mandompakkon haganup, sonari sihol ma tundalonkonnami haganupan mandompakkon Ham. Amen.

Haleluya No. 143: 1, 4: O Tonduy na Manggoki Uhur >>
1. O Tonduy na manggoki uhur, ni saksi-saksi na parlobei in,
Seng ongga-ongga marnamundur, mangimbang munsuh ni Tuhanta in
Puhoi pakon uhur nami on mandodingkon
4. Antong buei baen Ham suruhan, na sai tongtong igoki Tonduy-Mu.
Janah na ringgas marambilan manogu halak hu gomgoman-Mu,
Taluhon Ham sibolis in tongtong ramoti hata-Mu i tanoh on .