2 Desember: Dong do panorang ni Tuhan manangihon hita

tnt_des2_jesus_anak2

 

Jadi irohop ma sidea anjaha itampeihon ma tangan-Ni bani sidea, laho mamasu-masu sidea. (Markus 10 : 16)

Sonai ma, Tuhan Jesus, basar janah holong bani dakdanak. Seng ihatahon: Seng dong panorangku, seng sompat, seng tarhona patangi-tangi dakdanak. Seng sonai. Dong do panorang-Ni patorsa dakdanak. Halani dakdanak, ipasoh do horjani na legan. Anggo roh dakdanak, ialehon do janah ipasu-pasu. Mase? Halani holong uhur-Ni bani sidea, sihol urupan-Ni sidea.

Sonai do Tuhan Jesus ronsi sadari on. Sonari pe holong do uhur-Ni bani dakdanak. Malas uhur-Ni mangurupi sidea. Ididah do sidea haganupan janah itangar do anggo roh sidea hu Bani. la do namin simada kuasa i Nagoriatas pakon i tanoh on, sonai pe dong do panorang-Ni mangurupi dakdanak na banggal age na etek, janah itangihon do atap aha ihatahon sidea hu Bani.

Dear ma ingatonta an hubagas uhurta: Dong do panorang ni Tuhan Jesus mardingat ahu, dong do panorang-Ni manangihon ahu. Hatahon ham ma ai hubagas uhurmu dob puho ham sogod atap laho modom bodari, atap sanggah dong hasosakanmu. Porlu do ai ahaponkon: Dong do panorang ni Tuhan Jesus manangihon tonggongku anggo martonggo ahu hu Bani. Dob martonggo hita naahapkon ma mantin ni parsaoron ai.

Anggo naidah ma na banggal-banggal i dunia on, seng sungkup be panorangni patorsahon parsahapan na etek-etek (perkara kecil). Tarimakasih banggal ma halani dong Tuhanta na patorsahon na malumat. Harga ma ai ibagas uhurta. Ai aha ma hita jolma namin marimbang Naibata? Ase pala idingat uhur-Ni hita? Sedo pitah etek hansa hita, tapi butak homa halani dousa. Hape Tuhanta na Pansing sahalian, banggaltu do namin holong-Ni bani hita jolma ronsi bani dakdanak.

 

Ham Tuhan Jesus, tarima kasih ma Bamu halani itarhonahon Ham do mamasu-masu dakdanaknami, tarhona do Ham manangihon pakon manjalo tonggonami. Pujionnami ma dear ni layak-Mu. Amen.

Haleluya No. 193: 1-3: Ise do Anggiku >>
1. Ise do angging-Ku atap botouhin
Nini Tuhan Jesus bai dakdanak in.
2. Ganup sihorjahon hatang-Kin torang,
aai pasu-pasuon ase sai sonang.
3. Sai ringgas ma hita mandalankon in.
ase dapot hita pasu-pasu in.