21 Desember: Paturut Hatani pa Tonduyni Marhorja Ibagas Dirimu

 

tnt_des21_pil_1_6

 

Ia, na dob mamungkah horja na madear ibagas nasiam, dobhononni do in das ronsi ari ni Kristus Jesus. (Pilipi 1 : 6)

Hata ai isuratkon Apostel Paulus bani Kuria Pilippi, tapi das homa hu banta sonari on. Ai Naibata dos do bani panorang sapari, sonari ampa hunjon hujanan. Tuhan Jesus domma mambagahkon hata on bani susianni: “Sai hasomananku do hanima siap arian ronsi marujung dunia on” (Mat. 28 : 20). Tenger ma uhurta manjolom bagah-bagah ai mannunuti pardalananta dompak nagori-atas, sedo sahalak hita sapardalanan rap do hita pakon Tuhanta ampa hasoman sapardalanan.

Ai ma homa hiteita mantaluhon uhur jahat, na tubuh ibagas dirinta, ase lambin torsa uhurta, hatanta ampa parlahouta. Age pe iahap hita manggulmit uhur jahat ai ibagas dirinta, Tuhanta na mangkasomani hita do mangurupi hita mangusir ai, ase ulang maila hita bani parroh ni Tuhan Jesus Kristus.

Tapi botoh ham ma, ai haganupan sedo horjamu, tapi horja ni Tonduy na Pansing do. Ia do mambere gogoh bamu laho mandobkon horja-Ni na dob ipungkah ibagas dirimu, halani idop ni uhurni. Tapi na porlu: Paturut ham ma Hatani pakon Tonduyni marhorja ibagas uhurmu, laho mangambukkon sagala onjolan ni uhurmu paima hibul ganupan maronjolan bani Naibata. Martenger ni uhur ma ham hubani Naibata humbani gok ni uhurmu, jadi bereonni ma Bamu gogoh laho patorsa uhurmu.

Paima marhotak Ia ibagas uhurmu, gabe Ia ma sisungkunonmu. Tarehon ham ma uhurmu itopa, ituhangi Naibata, ase idobkon, ulang sagang horjani, ase tarpakei ham bani parroh ni Tuhanta Jesus Kristus.

Tontu iahap ham do, dob ijalo ham ambilan na madear pasal Tuhan Jesus na sinuruh ni Naibata manobus hita, na dob marhorja do Naibata ibagas uhurmu. Artini domma pungkah horjani ibagas dirimu. Na porlu botohonta, ulang be ibahen hita marlangkor-langkor horja ni Naibata banta. Ulang sagang, tapi porlu itoruskon ase dob janah torsa hita bani parroh ni Tuhanta Jesus use, age bani parroh-Ni mangalop hita bani ujung ni langkahta.

 

Ham Tuhan Naibata! Domma ipamasuk Ham ahu hubagas harajaonmu, domma ipungkah Ham horjamu ibagas diringku, dobkon Ham ma ai. Amen.

Haleluya No. 113: 1 – 3. Asal Rap Ampakon Tuhan Jesus Au >>
1. Asal rap ampakon Tuhan Jesus au.
Sadokahni mangiankon tanoh hasusahan au.
Sonang do uhurhu, ai hubotoh Jesus hasomanku.
2.Anggo Tuhan Jesus hasomanku tong
Bahenonku do maporus sigompangi tonduyhon.
Sai martuah diri, anggo Jesus do hasoman diri.
3.Sonang do uhurhu rapkon Jesus in.
Ai isasap do dousangku, ipatorang langkahkin.
Ase ulang magou tonduyhin bahenon ni pangagou.

Advertisements