23 Desember: Mangirikkon Jesus Ibagas Malas ni Uhur

Ai pe marpesta ma hita, ulang marhitei na migar na dob madokah, ulang marhitei na migar hajahaton atap hasamboron, tapi marhitei ruti na so niigaran ma ibagas hasusion ampa hasintongan. (1 Korintus 5: 8)

Na hinatahon ni apostel Paulus bani ayat on: Marmalas ni uhur ma hita, marjumpahkon Naibata marhitei Biribiri paska, ai ma Jesus Kristus, mangan ruti na so niigaran ma bani panorang ai.

Parlahouta na so maragu, haporsayaonta pitah, ai do boanonta bani Naibata. Tenger ma uhurta bani pangkopkopon ni Tuhanta Jesus boi marhinsah ni uhur hita (marpesta) roh hubani Naibata. Seng dong sipangunsagaonkonta hubani Naibata, par dousa do hita. Hurang iparduli hita do Naibata, mardousa do hita dompak Naibata. Uhuman nari mando namin sipaimaonta. Tapi domma roh Sipaluah hita, ai ma Biribiri ni Naibata na mamorsan dousa ni hajolmaon, jadi dihut mamorsan dousanta.

Anggo ihaporsayai hita ai anjaha tenger uhurta boi ma marmalas ni uhur hita mandompakkon Naibata, ai domma tarbunuh Biribiri paska ai (Jesus Kristus), marpesta ma hita, marmalas ni uhur ma hita, malas ni uhur ma hita.

Ia na marpesta, sedo ai marsasahalak, marbuei-buei do. Sonai do hita marbuei-buei hinopkop ni Tuhan Jesus Kristus. Ibagas hata marpesta ai do porlu hita marsaor ibagas Tuhanta pakon hasomanta halani haporsayaonta padalan holong dompak hasoman ronsi mantonggohon pe. Anggo sonai ma, pambahen ni Naibata pasirsir haluahon banta, patut ma malas uhurta roh bani Naibata. Irikkon hita ma Tuhan Jesus, orod ma hita Bani. Malas ma uhurta, pabasa-basa Hatani pakon martonggo hu Bani. Malas ma uhurta mandoding mamuji goranNi.

 

Ham Tuhan Naibata, Bapanami! Tarima kasih banggal ma Bamu halani ra Ham manangihon tonggonami, bahen Ham ase malas uharnami, songon na marpesta laho marjumpahkon Ham. Amen.

Haleluya No. 29: 2, 5. Hanima na Porsaya in >>
2. Marmegah-megah uhur ma, sagala na bujur homa,
lao mangirikkon Jesus
In pe rombang patidak ma, megahmu bani Naibata
Pasaud ma harosuh-Ni
Puji, puji Jesus Kristus na manobus tonduy nima
Humbai hamagouan nima
5. Jahowa, holong atei-Mu, kawahkon ma Kuria-Mu,
sai togu uhurnami.
Bai Jesus Kristus, Anak in, na roh hu manisia in,
mambahen tuahnami.
Lanjar, bujur baen hanami mandalani bai na sonang,
das bani inagori atas.