24 Desember: Pesta Natal

tnt_des24_natal1

 

Sonang ni borngin in sanggah roh Jesus in, sonang modom do halak gonap, dua mando na puho in rap, mangoromi anakni, Jesus Tuhanta in (Haleuya No 39).

Ija-ija das ambilan na madear, das do homa hujai doding in. Iguruhon dakdanak pakon na magodang, iajarhon bani Sikolah Minggu.

Anggo ibogei hita doding on idodingkon, mintor idingat hita do pesta partubuh ni Tuhan Jesus (hari Natal) na i Betlehem ai, mintor ratah do banta ni partubuh ni Tuhanta, ronsi barita ni parmahan na i Eprata. Bani mata ni pesta ai pe malas tumang do uhurta anggo rap ma hita na satangga mandodingkon doding in, sonai homa i gareja pe.

Bani panorang ai ma idingat hita iungkab Naibata langit, isuruh malekatNi mamuji Naibata, ai marbadan ma idop ni uhur Naibata na paluah jolma. ljai ma jumpah ni hata on: “Ai sonon do parholong ni atei ni Naibata bani dunia on, pala do Anakni sisada-sada ai iberehon, ase ulang magou sagala na porsaya Bani, tapi ase dapotan hagoluhan sadokah ni dokahni” .

Pesta malas ni uhur do tong pesta Natal (Hari Natal). Ididah hita do dirinta, gok dousa, gok hajahaton, gok hagalekon. Tapi bani panorang pesta in ibogei hita do domma tubuh Sipaluah hita humbani haganupan ai, ai ma Tuhanta Jesus.

Na porlu banta, ai ma ase tubuh Sipaluah ai ibagas uhurta, ase dong kamarni na lumbang ibagas uhurta. Ambah ni ai ope, porlu dong hotakni ibagas uhurta. Artini, Ia ma raja ni uhurta raja goluhta pakon raja ni pansarianta. Sijagaonta do bani musim-musim pesta in (Hari Natal), ase ulang i darat hansa mariah gaba-gaba, rudang-rudang, musik, gonrang pakon doding koor atap tarompit na marbagei-bagei hansa, hape seng iihut-ihut uhurta hata ni ayat, hata ni ambilan atap hata ni doding pe.

Maningon parimbagasonkonta do ai ase marlaba hita humbani pesta banggal ai.

 

Tarima kasih ma Bamu Tuhan Jesus, halani ra do Ham ijuljul holong ni ateiMu, roh bannami laho paluahkon hanami humbani dousanami, ase masuk hanami hu harajaon, ni Naibata. Amen.

Haleluya No. 39: 1 – 3. Sonang ni Bornginni in >> 

1. Sonangni, bornginni in, sanggah roh Jesus in
Sonang modom do halak ganup dua mando na puho in rup
Mangoromi AnakNi Jesus Tuhanta in
2. Dear ni bornginni in sanggah roh Jesus in
Bai parmahan i Betlehem in, ipatugah na hun surga in
Domma roh Sipagoluh, Jesus Tuhanta in
3. Buei ni tuah ijin, sanggah roh Jesus in
Tor maluah pardousa use, humbai hamagouanNi hape
Ben na roh Sipagoluh, Jesus Tuhanta in.

Advertisements