27 Desember. Aha do labamu humbani Hari Natal ai

tnt_des27_artinatal

 

Ia si Maria iparimbagaskon do haganup hata ai, anjaha ipingkirpingkiri ibagas uhurni. (Lukas 2: 19)

Domma salpu pesta pardingatan pasal partubuh ni Tuhan Jesus (Hari Natal). Ibogei hita do bani pesta ai, ayat-ayat pakon ambilan pasal partubuh ni Tuhan Jesus.

Sonaha do sonari pangkorhon ni hata ai bamu? Aha do labamu humbani Hari Natal ai?

Anggo sihol marlaba hita humbani Hari Natal ai, usihi hita ma si Maria, na marimbagaskon pakon na mamingkir-mingkiri ai ibagas uhurta. Naparimbagaskon, artini masuk hubagas uhur, marianan ijai janah dapot ope na pahusor-husor ibagas uhur, napingkiri.

Aha do sipingkiran ijai? Jolma manisia domma manundalhon Naibata, domma mardousa, seng iparduli be Naibata. Hape roh Naibata, isuruh Anakni laho paluahkon jolma sisonai ai. Aha na taridah ijai? Ai ma holong ni atei ni Naibata, na so niarusan ni jolma biasa.

Jolma na porsaya do boi mangarusi holong ni atei ni Naibata na marhitei Jesus Kristus. Ai ma nidok ni ayat ai Johanes 3:16: “Ai sonon do parholong ni atei ni Naibata bani dunia on, pala do there Anakni sisada-sada in, ase ulang magou sagala na porsaya Bani, tapi ase dapotan hagoluhan sadokah ni dokahni“.

Parlajari hita ma marimbagaskon hata ni Naibata na binogeita i gareja. Parlajari hita ma pongkut manangihon ambilan, timbangi hita, pingkiri hita ma na binogei ai. Parlajari hita ma martonggo humbani bulat ni uhur, mandoding humbani gok ni uhur.

Ganupan ai maningon iirikkon uhurta do ase masuk hubagas uhurta. Parlajari hita ma marimbagaskon hata ni Naibata age na binasanta, atap binasa ni hasoman banta.

 

Ham Tuhan Jesus! Urupi Ham ma ahu marimbagaskon hataMu, songon si Maria ai, ase marulih ahu bani hataMu ai. Amen.

Haleluya No. 33: 7, 8, 11. Na Roh hun Datas do Au on >>
7. On pe uhurhu, tanda ma, ganupan in patangkas ma;
Ai ise na dob tubuh in? In ma Jesus, huanta in.
8. Diatei ma Ham roh Tuhan, sombuhku iayaki Ham,
Maharga bai uhur-Mu in, au jolma na tarbuang in.
11. Haleluya, Haleleya! Domma roh banta Naibata.
Martuah hita baenon-Nin, sadokah ni dokahni in.