28 Desember: Arti ni gabe anak ni Naibata

tnt_des28_gabeanak2ninaibata.jpg

 

Tapi barang piga na manjalo-Si, hujai do ibere kuasa, ase gabe anak ni Naibata sidea, ai ma na porsaya bani Goranni. (Johanes 1: 12)

Tontu sihol boi do uhurta ase gabe anak ni Naibata hita. Tapi sonaha dalanni ase boi hita gabe anak ni Naibata?

Nauji do mandalankon titah ni Naibata, tapi tarahap do sai talu do hita ibahen gogoh ni dousa. Nauji do mangkaholongi Naibata, tapi tarahap do seng marisi holong diri. Seng boi hita gabe anak ni Naibata marhitei dalan na sonai ai. Sada do dalanni ipatugah hata in: Jalo hita ma Jesus gabe Sipaluah banta, ijai ma ibere Naibata banta kuasa ase gabe anak ni Naibata hita. Haporsayai hita ma Jesus ijai ma jaloonta gogoh ase gabe anak ni Naibata hita.

Dalan na legan seng dong be. Ai do dalan pinasirsir ni Naibata, sedo homa pitah hita bani ganup jolma do ibuka Naibata dalan ai. Anggo anak ni Naibata ma hita, panean ma hita bani Naibata, panean bani arta ni Naibata, hagoluhan na sadokah ni dokahni ai i nagoriatas.

Anggo sihol do ham sonai, jalo ham ma Jesus gabe Sipaluah pakon Sipagoluhmu. Sedo pitah magira, sonari pe Bapanta ma Naibata. Anggo sonai hu Bani ma hita marsuhutan pusok ni uhurta. Hu Bani ma patugahonta anggo dong malas ni uhurta, na songon laporan ni anak bani bapani. Pasangapkon janah patunggungkon goranni ma hita marhitei Tuhan Jesus.

Anak atap boru ni raja sapari, nasi tuan ma ai pakon nasi panakboru. Legan do parsahapni pakon parlahouni, parsahapni pe tuanni ma tongon, panakboru ma tongon. Hita pe nasi tuan pakon panakboru surga do hita ai anak pakon boru ni Naibata do hita humbani sonari nari, tapi magira pe talar ai. Tapi pasomal hita ma humbani sonari, ase tarahap bani hasoman, na dearan parlahouta, hauhuronta pakon parhatanta, na tongon ma hita nasi tuan surga, nasi panakboru surga.

 

Ham Tuhan Naibata! Urupi Ham ma hanami ase ijalo hanami Tuhan Jesus gabe Sipaluah hanami janah Sipagoluh hanami, ase gabe anakmu hanami. Amen.

Haleluya No. 119: 1, 2. Bintang Pambobai >>
1. Bintang Pambobai Batu Gingging in
Tungkot sijolomon bai na landit in
Ruti hagoluhan bah na torsuk in
Alat situjuan in ma Jesus in.
Alat situjuan in ma Jesus in.
2. Ham tongon gogohku, pangajamankin,
damei ni uhur-Mu, hasonangankin
Goluh ni tonduyhu, hatuahonkin,
in ma alo Tuhan; Ham tumang do in.
in ma alo Tuhan; Ham tumang do in.

Advertisements