29 Desember: Sipamahan hita, na patorsahon goluhta

tnt_des29_joh 10_14

 

Ahu do parmahan na madear, hutanda do na Bangku, anjaha itanda sidea do Ahu. (Johanes 10: 14)

Sada garama na parah boritan, songon na ibotoh ma gakni dohor ujung ni goluhni (ajalni). Roh do gamot ni Kuria manungkunsi atap mabiar do ia laho matei. Ipatuduhkon ma sada gambaran na tibal bani meja na dohor bani podomanni, na manggambarhon Tuhan Jesus Parmahan na Dear. Bani gambaran ai taridah itampeihon Tuhan Jesus sada biribiri bani abarani. Gabe nini ma: Mase mabiar ahu laho matei, ai biribiri ni Tuhan Jesus do ahu, anggo rotap hosahku mintor abingon ni Tuhan Jesus do ahu hu Nagoriatas, ai itanda Tuhan Jesus do ahu.

Hita pe porlu do itanda hita Sipamahan hita, na patorsahon goluhta, na patuduhon gagaton na mombur pakon bah na lihou banta ibagas goluh on. Ulang ma ninuhurta atap halani nasipta, goluhta atap hapandeanta, ase dear pardalan ni goluhta, halani Siparmahan hita do.

Pangahap na sonai ai ma paroh uhur tarima kasih pakon puji-pujian ampa na mangondoskon diri bani Parmahan Bolon ai, ase gok Bani hita.

Biribiri na bujur ai tangi do bani hata ni parmahan-Ni. Hita pe tangi ma hita bani hata ni Tuhanta Siparmahan hita ai. Porluhon ham ma mambasai hata ni Tuhan Jesus na dob tarsurat bani Epanggelium na 4 in (Mateus, Markus, Lukas pakon Johannes). Ijai ma iahap hita lamlam ni hata ni Parmahan Bolon ai, Parmahan na Dear ai.

Sai malas ma uhurta manangar anggo iambilankon hata-Ni ai. Malas ma homa uhurta mandalankonsi. Tenger ma uhurta, itanda Parmahan ai do ganup biri-biri-Ni, itanda Tuhan in do ganup siminik-Ni ibotoh do sonaha pardongni, itanda do hita sada-sada. Ibotoh do atap ibagas malas ni uhur atap ibagas pusok ni uhur hita. Ibotoh doi atap aha hahuranganta. Holong do uhur-Ni mangidah hita sada-sada.

 

Ham Tuhan Jesus! Paahapkon Ham ma bannami holong ni atei-Mu na paluahkon hanami humbani dousa, sonai homa parmahani-Mu bannami ari-ari. Sai martenger ni uhur ma hanami hubani parmahanonMu ai. Amen.

Haleluya No. 127: 1 – 3. Jahowa Siparmahan Au >>
1. Jahowa Siparmahan au, aha pe lang hurangni.
Na sambor pe sai ipadaon, do humbai pinahan-Ni
Tudu ibaen na lambut in, lao pagoluhkon tonduyhin.
Ibaen holong atei-Ni.
2. Itogu au bai na lihou, bah tubuh hagoluhan.
Ibaen do tonduyhin siou, bai dalan hasonangan.
Sonang do uhur hin tongtong, sadokah au itanoh on,
pasangapkon goran-Ni.
3. Itanoh hamateian pe seng pala habiaran.
Ai isondangi do hape sonang do au mardalan.
Simambu pakon tungkot-Mu do pasonangkon uhur hin,
Hal do sijolomanku.

Advertisements