3 Desember: Domma das ambilan ai bamu?

nt_des3_rohhujesus

 

 

Tonduy ni Tuhan in do sogop hubangku, ai iminaki do ahu, laho mangambilankon ambilan na madear bani halak na masombuh. (Lukas 4: 18a)

Mungkahni marhorja Tuhan Jesus, lape piga dokah roh ma ia hu hutani huta Nasaret, ijai ma ibasa hata na tarsurat iatas in. Roh do Tuhan Jesus mangambilankon tahun idop ni uhur ni Tuhan.

Roh do ra das hu tongah-tongahta iambilankon do ambilan na madear bani na masombuh, ipaluahi na hona dorun.

Sonaha do na masombuh na ginoranNi ijon? Ai ma na mangahap sombuh ni partonduyonni, aha pe lang dong bani: Seng dong malas ni uhur, seng dong damei ibagas uhurni. Iuji do marmalas ni uhur mangkamalaskon na i dunia on. Tapi urah do melus malas ni uhur ai, sedo na sintong, na urah mulbas, na urah mutah do malas ni uhur na i tanoh on. Pusok ni uhur na baru do gantih ni malas ni uhur ai. Gabe masihol ma uhurni bani malas ni uhur na humbani Naibata, sihol ma uhurni mardamei pakon Naibata. Bani sisonai roh ma Tuhan Jesus mangkatahon: “Martuah ma na sombuh tonduy ai bani sidea do harajaon ni Naibata”.

Domma buei mambogei ambilan na madear, domma buei na mambalosi dilo-dilo in Tuhanta, buei ma na martarima kasih mambalosi dilo-dilo ni Naibata halani holong pakon idop ni uhur-Ni. Na dob roh bani Tuhan Jesus maningon iirikkon do Tuhan Jesus orod manjalo idop ni uhur-Ni. Dapotsi do idop ni uhur. Dapotsi do malas ni uhur humbani Ambilan Na Madear ai, janah ai ma gogohni mantaluhon dousa.

Domma das hu Simalungun Ambilan Na Madear ni Tuhan Jesus Kristus, domma roh Ambilan Na Madear ai bani halak na masombuh.

Domma das ambilan ai bamu? Aha do ambilan na madear ai?

Ai ma partobuson ni Tuhan Jesus ase maluah hita humbani dousa ampa gomgoman in sibolis gabe pintor hita halani hapintoron ni Tuhan Jesus, gabe anak ni Naibata ma hita.

Sonaha ham, ra do ham mambogei Ambilan Na Madear ai? Ra do ham roh hubani Tuhan Jesus. Basai ham ma pasal pargoluhon-Ni ronsi parrnatei-Ni mangkopkop hajolmaon pakon ham. Parimbagasskon ham ma ai. Roh ma ham age sonaha pardongmu. Anggo masombuh tonduymu boi do ipabayak, ia jut uhurmu boi do ipalupung.
Ham Tuhan Jesus! Na masombuh do tonduyhu, pasu-pasu ham ma ambilan na madear ai bangku. Amen.

Haleluya No. 133: 6,7: Holong do Atei >>
6. Manggoluh ahu binaenni Hata
ni Tuhan Jesus bai tonduyhin.
Ai do ‘se ningku tong:
Holong do atei ni Naibatangku mangidah au.
7. Hagoluhanku tongtong Hata-Ni,
sombuh horahku binaen ni in.
Ai do ‘se ningku tong:
Holong do atei ni Naibatangku mangidah au.