31 Desember: Hapintoron-Ni gabe hapintoronta

tnt_des31_1pet2_24

Iporsan do dousanta ibagas angkulani hubani hayu ai, ase matei hita bani dousa, gabe manggoluh bani hapintoran. Anjaha marhitei ugahni ai do malum nasiam. (1 Petrus 2: 24)

Sonai ma hita tongkin bani ujung ni tahun on, manungkun dirinta: Romban do parlahouta bani hata ni Naibata? Atap mangihutkon rosuhta do hansa parlahouta. pargoluhonta ibagas na satahun in?

Marbalos na hita ilobei ni Naibata na mangidah torus hubagas uhurta. Sonaha do parlahouta dompak parinangonta, dompak paraniangonta, dompak paramangonta, dompak namatorasta, dompak orangtuanta? Sonaha dompak tokehta, dompak buruhta? Iurupi hita do sidea ase ipasangap Naibata, atap marhitei hita gabe tartogu sidea mardousa, marhitei hatanta ampa parlahouta?

Sonaha do pardongni parlahouta ibagas na satahun in? Mangkawah ma hita bani na salpu bani na dob binontasta, buei do dousanta dompak Naihata ampa dompak hasoman jolma.

Mangkawah ma hita hubani Tuhanta, iporsan do hape dousanta ibagas angkulani hubani hayu parsilang ai, ai ma mambahen marhapintoron hita. Aha pe lang na madear ibagas dirinta. Ia do hansa manopa hita halani holong-Ni, ase boi hita boanon-Ni hu hagoluhan na sadokah ni dokahni ai. Marpingkir ma hita lobei, roh ma hita hu lobei ni Tuhanta, ai iporsan do dousanta, ipaborsih do hita humbani dousanta. Ugahni do hamalumonta.

Borat ope uhurmu roh hubani Tuhanta? Na porlu manggoluh ma hita bani Tuhanta janah matei hita pasal dousa. Tuhanta ma gabe raja ibagas uhurta, lang be hita irajai dousa. Lang be dong kuasa ni dousa banta. Hita na geduk hinan, gabe idoudou daroh ni Tuhan Jesus, ase gabe pintor. Hapintoron ni Tuhanta maningon ijalo hita gabe hapintoronta, jadi gabe parpintor ma hita ilobei ni Naibata, age pe pargeduk hinan.

Ham Tuhan Jesus! Pardousa banggal do ahu, tapi domma iporsan Ham dousangku, ase gabe pintor ahu halani hapintoron-Mu, ase boi ahu masuk hu Nagoriatas. Tarima kasih banggal ma Bamu. Amen.

Haleluya No. 59: 1, 3, 5. Ganupan na Tinompa >>
1. Ganupan na tinompa roh nasiam manatap,
hagoluhanmu on.
Gantung bani parsilang manaron hamateian,
Sol ingatonmu in tongtong.
3. Aha do manginsonoh Bamu, sibere tuah,
bai hajolmaon in?
Seng ongga Ham mardousa songon hanami jolma;
Bamu seng ongga masa in.
5. Tarima kasih ningku Bamu na pala matei
Lao pagoluhkon au.
Tong ma paruhuranku, na masik bunuhonku,
Sai gok Bamu na mando au.