13 Pebruari: Mase ipaturut Naibata na porsaya itongah-tongah ni na so porsaya in?

tnt_feb13_asegabepasupasu

 

Paturut ma rap tubuh paima jumpah sabion. (Mateus 13: 30a)

Porlu iahap hita, na ituntun Naibata do paturut hita na porsaya rap pakon na so porsaya i dunia on. Mase ma nani ipaturut Naibata na porsaya itongah-tongah ni na so porsaya in?

Ase gabe pasu-pasu na porsaya ai bani na so porsaya ai. Ase marpangkorhon na porsaya ai bani na so porsaya, ase ipindahi sidea Naibata.

Na idilo do hita gabe parhorja bani Naibata. Halani ai pindoonta ma gogoh, sonai age pasu-pasu bani horjanta ari-ari, uhurta pakon parlahouta ase ganup ai manogu uhur dompak Naibata.

Mahol do arti ni hata ai banta: hita gabe pasu-pasu bani na legan. Ai tarbahen do ai? Tapi nini Tuhan Jesus do: Anggo bah sibereonkonkai jadi bah tubuh do ibagas dirini, na marburak-burak das hubani hagoluhan na sadokah ni dokahni (Joh. 4 : 14). Ase anggo kontak hita pakon Tuhan Jesus, anggo ijalo hita pasu-pasu humbani, gabe pasu-pasu ma hita homa. Atap pakon ise hita marsaor dihut do ai dapotan pasu-pasu. Tapi sedo pasu-pasumu, pasu-pasu ni Naibata do marhiteihon ham.

Tapi ingat ham, anggo torus hita manjalo pasu-pasu pakon gogoh humbani Naibata, garam na mardai ma hita.

Tapi anggo lang be, garam na dob mambar ma hita, lang be hita marpangkorhon (berpengaruh), suhar-suharni ai do, gabe dunia on ma marpangkorhon hu banta. Ai ma mambahen dong use deba Kristen na mangkorjahon uti-utian ni halak sapari, mambahen ajimat atap tangkal-tangkal, na mamilih ari, mansuhuni sir ni uhur pakon na legan. Ia do tarihut bani ugama sapari sedo halak itogu bani Naibata marhitei Tuhan Jesus. Sedo sidea itogu hita hu lobei, tapi hita do idokdok mundur hu pudi.

 

Ham Tuhan Naibata, ulang sirang hanami Humbamu, ase tong hanami dapotan pasu-pasu janah boi gabe pasu-pasu homa. Ramotkon Ham hanami humbani dunia on pakon sagala uti-utianni! Amen.

Haleluya No. 120: 1, 4. Sai Hinsah Sai Gogoh >>
1. Sai hinsah, sai gogoh, sai hinsah mardalan ho.
Sion hu nagori atas, tongkin pe ho ulang soh.
Suluhmin baen marsinalsal! Bai na lihar in mardalan ho.
Sai hinsah, sai gogoh.
Tundal in, tundal in.
4. Uji ma, uji ma. Sion uji tonduy in,
na tongtong mangojur-ojur ho mambahen dousa in.
Sai suhutkon bai Tuhan-mu! Na pintor atap geduk pe in.
Uji ma, uji ma.