17 Pebruari: Tungguon ni Naibata do Talenta Binereni Banta

tnt_feb17_talenta

 

Lanjar pamasuk nasiam ma na so margagan in bani na golap marimpot-impot! Ijai ma masa partangison pakon na patungos-ngoson. (Mateus 25: 30)

Ibere Naibata do banta talenta (sibere-bere), ase ipakei hita ai banta pakon bani hasoman pakon bani harajaon ni Naibata. Deba buei do ijalo talenta ai, deba otik, seng dong na so manjalo talenta humbani Naibata.

Ningon bahenonta do use parturiakan pasal sagala jinalonta humbani Naibata, maningon partanggung-jawabonkon. Halak na manjalo talenta humbani Naibata ibagas haporsayaon, lambin tambah do talentani. Na mamakei talentani dompak na jahat, ia ma na so margagan ai, ningon padaraton bani na golap marimpot-impot.

Seng gendo ipakei ham talentamnu mambahen siakan hasomanmu, atap pahirihon harajaon ni Naibata?

Ra do homa lang iahap ham atap aha ibere Naibata bamu talenta, na boi mamboan pasu-pasu bani na legan. Seng dong talentangku, nimu. Anggo sonai dihut ma ham juak-juak na so margagan ai.

Aha ma talentamu? Anggo ibere Naibata bamu hajorgiton, ipakei ham do ai patorsa harajaon ni Naibata ampa patorsa hasoman? Dong duitmu, sonaha ipakei ham do ai gabe pasu-pasu bamu, ipakei ham do ai manumpaki hasoman na tarsosak, ipakei ham do ai manumpaki harajaon ni Naibata? Gogoh na pinakeimu ari-ari pe talenta do. ai humbani Tuhanta, ipakei ham do ai dompak hasoman ampa dompak kuria ni Tuhanta?

Botoh ham ma bagei do talenta ibere Naibata banta bei. Ibotoh Naibata do hubani ise ibere buei, hubani ise ibere otik. Romban hujai do tungguon ni Naibata. Tapi na bajan ijon: Humbani na so padalankon buaton pakon na bani hinan janah ibuang ia bani na golap marimpot-impot. Ijai ma masa partangison pakon na patungos-ngoson (naraka).
Ham Tuhan Naibata, Bapanami! Paahapkon Ham ma hu bannami sagala sibere-beremu (talentanami). Urupi Ham ma hanami mamakei ai romban bani harosuh ni uhurmu. Amen.

Haleluya No. 6: 3, 8, 15. Ham do Ipuji Uhurhon >>
3. Ai aha ma na dong hinan bannai na sombuh on:
Ganup ibere Ham hinan, o Naibata tongon.
8. O Naibata, Ham do bayak, sibere hanai on:
Ai Ham do na tongtong layak, manumpak jolma on.
15. Paturut Naibata gelah patorsa langkahmin
Ase tongtong sonang ho lah, timbul ‘pa tuahmin.