18 Februari: Rudang hamonangan na so ra melus

tnt_feb18_1kor9_24_marlumba.jpg

 

Ai lang ibotoh nasiam, ia na maradu haganup do namin marlintun, tapi sada do manjalo hamonangan. Marlintun ma nasiam sonai ase dapotan nasiam! (1 Korintus 9: 24)

(Terjemahan baru, 1976, “Ai lang ibotoh nasiam, ia na marlumba haganup do namin na marlintun, tapi sada do na manjalo upah hamonangan. Sonai ma bujur nasiam marlintun, ase dapotan nasiam).

I huta Korintus, sai masa do na maradu marlintun ampa olahraga na legan. Ai sonai do somal i tanoh Gorik. Bani na sonang ibagas paraduan ai itampeihon ma rudang hamonangan. Tarbarita ma goranni bani nagori na inggot ai. Ai ma sinta-sinta ni namaposo (pemuda) bani panorang ai, ase dapot penghormatan sidea humbani halak ganupan. Halani ai idalankon do sagala gogoh ni pingkiran pakon angkula pasomal-somalhon (latihan), paima dapot panorang paraduan (pertandingan) ai. Ihorom do sagala na pagalekkon angkula, ihorom minum anggur pakon malas-malas uhur na legan ase totap margogoh uhurni pakon angkulani mangarapkon hamonangan ai.

Hujai ma ipatudos Apostel Paulus latihan ni haporsayaon ai, na mansura-surahon sortali na so ra melus. Tuhan Jesus ma use mambere sortali hamonangan ai, ilobei ni Bapani pakon sagala malekatni, bani sagala na monang.

Anggo sonai ma pongkutni manguhuri rudang hamonangan na ra melus i tanoh on, tontu lobihni ai ma uhur ni hita mangindahi rudang (sortali) na so ra melus ai i nagoriatas.

Sai ipargogohi Tuhanta ma hita marlintun bani haporsayaonta bani Tuhan Jesus Kristus Sipaluah in. Iurupi ma hita mangkorom sagala pantang ni haporsayaan, na pananget pardalan ni haporsayaonta.

 

Ham Tuhan Jesus! Pargogohi Ham ma ahu manjolom poltik haporsayaon bani pangkopkopmu. Urupi Ham ma ahu manlawan sagala pantang ni haporsayaonku, mangkorom sagala na so mardomu bani haporsayaonku hu Bamu. Amen.

Haleluya No. 184: 1, 7. Manjaga ma Hanima >>
1. Manjaga ma hanima na bujur uhur in;
Nahiti suluh nima ai roh ma borngin in.
Na roh ma Siparunjuk bai tunangan-Ni in.
Na tong mangkasiholi Parunjukon-Ni in.
7. Ijon do lambei gorsing hamonangan-Ni in.
Ijon hiou na pansing, hapintoron-Ni in.
Ijon do hadameion ni na maruntol in.
Ijon do hagoluhan ni na binunuh in.