20 Februari: Lang dong onjolan na legan sobali Jesus Kristus

 

tnt_feb20_1kor3_11_onjolan

 
Ai palas nalegan seng tarbahen age ise, sobali na dob jonam ai, ai ma Jesus Kristus (1 Korint 3: 11)

(Terjemahan baru, 1976, “Ai seng tarpauli onjolan na legan, sobali na dob pinajonam in, ai ma Jesus Kristus in”.)

Tontu dong do pangarapanmu masuk ham hu nagoriatas bani ujung ni goluhmu. Dear ma ai, anggo dong pangarapan na sonai.

Tapi husungkun ma ham, aha do onnjolan (palas) ni haporsayaonmu ai pakon pangarapanmu ai. Anggo Jesus Kristus do, sintong ma palas ni haporsayaonmu ai bani palas na jonam. Seng be maila ham ai; seng maila atap ise na pajongjong haporsayaonni iatasni (Roma 9 : 33).

Tapi anggo ipajongjong ham haporsayaon pakon pangarapanmu bani na legan, lepak ma ai. Ai seng dong goran na legan itoruh ni langit parhiteanta hu hagoluhan (sobali goran Jesus). Tapi: Na dob dapotan hagoluhan sadokah ni dokahni do na porsaya bani Anak ni Manisia in (Joh. 3: 36).

Tapi anggo ipangunsagahon ham jasamu, atap dompak na masombuh, dompak kuria ni Tuhanta, ingat ham ma hata on: Haganup do sidea domma manimbil, haganup do sidea seng margagan, seng dong sibahen na madear, sada pe lang (Roma 3 :12).

Botoh ham ma, anggo hapintoronmu sandiri, seng dong ai margagan, ai ganup do ai marlapu dousa. Ase maningon hapintoron ni Kristus do hansa na asi, na sintong. la do pardearan pasaloseihon dousanta, tapi sedo pitah dousanta dihut do halani dousa ni dunia on. (1 Joh. 2:2). Ibagas Kristus do dapot partobuson marhitei daroh-Ni, ai ma hasasapan ni hasalahanta, mangihutkon idop ni uhurni na tarsulur in. (Ep. 1 :7)

Halani ai roh ma ham bani Tuhan Jesus mamboan dousamu. Domma iporsan dousanta bani hayu parsilang ai, ase ipasusi ham, isalihkon ham gabe anak ni Naibata anjaha boanon-Ni ham bani hagoluhan na sadokah ni dokahni.
Ham Tuhan Naibata! Banggal do idop ni uhurmu. Urupi Ham ma ahu ase hupatotap pangarapanku bani Tuhan Jesus Kristus, Sipaluah in. Amen.

Haleluya No. 130: 1, 6. Ai Domma Jumpah Au Ondolan >>
1. Ai domma jumpah au ondolan ni tonduyhin na magou on
Daroh ni Jesus do manahan sadokah ni dokah ni in.
Maseda pe dunia on, tongtong togap ondolan on.
6. Ondolan on ma iananku, sadokah au itanoh on.
Sai in ma hagoluhkononku paima rotap hosahkon.
Tongtong do sipujionkin Tuhanku, Sipagoluh in