21 Februari: Dalan Pag Roh hu Bani Naibata

Ase marhinsah ni uhur hita mangayaki hotak paridopniuhuran, ase dapotan parontou ni uhur pakon idop ni hita bahen partolongan bani panorang na dear honsi. (Heber 4: 16)

(Terjemahan baru, 1976, (“Ase marhinsah ni uhur ma hita marayak paratas idop ni uhur ai, ase dapotan parontou ampa idop ni uhur hita bahen pangurupion bani panorang haporluanni)”.

Marhiteihon daroh pangkopkopon ni Tuhan Jesus, boi hita goranon anak ni Naibata janah pag roh hu labei ni Naibata, Bapanta na i nagoriatas.

Domma iakuhon uhurmu ai? Domma gabe anak ni Naibata ham iahap ham? Domma ijalo ham hasasapan ni dousamu halani sitaronon pakon parmatei ni Tuhan Jesus Kristus? Marhinsah ni uhur do ham ari-ari roh bani hotak paridopniuhuran ai, janah manjalo idop ni uhur na baru?

Marhiteihon idop ni uhur ai gabe malas uhurmu janah margogoh mantaluhon sagala parlajoan.

Buei do bani goluh on na sihol manundati ham hubani hotak idop ni uhur ai. Buei do na mangolati ham ulang saud manjalo idop ni uhur ai, ase ulang margogoh ham, ulang saud ham gabe anak ni Naibata, ulang porsaya ham bani hasasapan ni dousa na binahen ni Tuhan Jesus.

Tapi ingat ham ma: Dong do banta Sintua ni malim i nagoriatas, ai ma Jesus Kristus na tarsilang ai halani hita. Na dob tarlajou do Ia bani haganup, songon hita tapi seng mardousa. Ibotoh do sagala parlajoan na roh hu banta ai domma Ia tarlajou, janah holong do uhurni banta. Pindoonta ma bani tonggonta ase maidop uhur-Ni banta janah isasap ganup dousanta. Sai ipargogohi ma hita bani hagalekonta, sai dapotan parontou ni uhur pakon idop ni uhur ma hita, bahen partolongan bani panorang na dear honsi.

 

Ham Tuhan Naibata Bapanami, na inagoriatas! Parholong ni atei janah paridop ni uhur banggal do Ham. Sai bere Ham ma idop ni uhurmu bannami bani panorang na dearhonsi. Amen.

Haleluya No. 121: 1-3. Jesus Goluh ni Tonduyhu >>
1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.
2. Jolom au Jesus Tuhanku, jolom au sai tongtong.
Ulang sirpang be naiheihu humbai dalan na sintong.
3. Bai musim ni haba-haba pinaroh ni musuhkin,
Togu au das hu labah bani parsaranan in.

Advertisements