23 Pebruari: Sedo timbanganmu gabe suhat-suhat

tnt_feb23_mat20_15_siberebere

 
Serleng do matamu halani layak Ahu? (Mateus 20:15)

Na marhorja i pohon anggur ai humbani sogod ronsi bod, iagan ma buenan bereon ni simada pohon ai upah bani. Dong do namin padan ni sidea pasal upahni, tapi halani sonai homa ibere bani na marhorja tongkin tumang, ai ma mambahen na marhutuk uhurni, ai ma ase “serleng matani”.

Guru bani Naibata do pardongni sibere-bereni bani hita jolma. Ibere Naibata do na patut bamu ninuhur-Ni, ulang simburu ham atap itug uhurmu, atap serleng matamu dompak na legan ia dong iahap ham lobih sibere-bere ai bani na legan. Sedo pangahapmu atap timbanganmu gabe suhat-suhat (ukuran), uhur ni Naibata do. Atap habayakon atap hapentaran ibere Naibata bani na legan hape bamu lang. Sabar ma ham, sonai ma timbangan ni Naibata. Sabar anjaha hamalaskon ham ma sibere-bere ni Naibata na das bamu. Ulang ham marhutuk.

Hutuk do mula ni dousa i pohon Eden. Mase tang ibere Naibata panganon buah ni hayu na i tongah-tongah ni ai, ase das sidea pakon Naibata? Ai ma isuan sibolis ase marhutuk si Hawa dompak Naibata.

Sirsir do pambere ni Naibata banta age pasal arta na i dunia on, mangihutkon timbanganni na dear banta. Tapi dapot do hita mangindo tambahni. Pasal hagoluhan magira do deba igambarhon ijon. On do: Rap masuk do sagala na porsaya hu nagoriatas, age halak marjasa ninuhur ni sin dunia on, halak na markorban sadokah goluhni. Ai sedo upah, idop ni uhur do hansa, sedo parombou ni jolma sibere-bere ni Naibata do.

 

Ham Tuhan Jesus! Urupi ham ma ahu ase ulang dong uhur na simburu, uhur na itug, uhur ma marhutuk bangku. Tani ase huahap idop ni uhurmu bangku, anjaha ai hupangunsagahon bani goluh on ronsi bani goluh magira pe. Amen.

Haleluya No. 153: 3, 5. I Surga do Huan-huanta >>
3. Sai marpangkaut do hasoman bai holong ni atei ni in;
Hapeni anggo seng dapotan, sai sirang do parsaoran nin.
Ai pe baen hita Jesus in tongtong huan-huanta in.
5. Sai humpit hita do uhur-Ni, sintong do parsaoran-Ni in;
Manongtong holong ni atei-Ni bai ganup niain-Ni in.
Ai pe baen hita Jesus in tongtong huan-huanta in.

Advertisements