24 Pebruari: “Ase ulang idorab na golap in nasiam”

tnt_feb24a_mardalanbainalihar

 

“Mardalan ma nasiam, sanggah bani nasiam ope Panondang in, ase ulang irungkub na golap nasiam”. (Johannes 12:35)

(Terjemahan baru, 1976: “Mardalan ma nasiam, sanggah bani nasiam ope Panondang in, ase ulang idorab na golap in nasiam”;)

Dong do halak Kristen na mardalan bani na golap ibagas partonduyon. Seng itangihon golpa-golpa ni Naibata ase mardalan bani na lihar. Songon na tarsangkut do ia bani sada dousa (uhur haut, ladung, gijang ni uhur, uhur daging, pnl.) mardalan do ia bani na golap, halinoh ni hagolapan sadokah ni dokahni, ujungni irungkub hamatean lalab ai ma, ai ma parsirangan pakon Naibata.

Soh, marpingkir ham tongkin: Anggo bani na golap ope ham sonari laho ma ham, ajaki ham ma sinalsal ni na lihar ai. Tuhan Jesus do Panondang ai. Ihatahon Tuhan Jesus do Ia panondang. Jadi anggo roh hita bani Tuhan Jesus, ai ma na mangayaki na lihar ai. lajari do hita mananda-Si pakon mananda Naibata. “Laho ma ham hun lambungkon Tuhan, ai halak pardousa do ahu!”nini Apostel Petrus. Seng torang ope ibotoh: “Na mangindahi janah pagoluhkon na magou do ase roh Tuhan Jesus”. Ase ijalo na porsaya in hagoluhan na sadokah ni dokahni.

Itohu Tuhan Jesus do ham, mardalan bani na lihar do ham iarahkon. Seng tarbahen be hita songon Apostel Petrus rap mardalan badanni pakon Tuhan Jesus. Tapi ibagas partonduyon, boi do rap mardalan hita pakon Tuhanta bani na lihar ai. Boi do itanda ham Tuhanta marhitei na mambasa Hatani, marhitei na martonggo hu Bani, gabe ibere ma bamu Tonduyni.

Anggo lambin romban goluhmu bani goluh ni Tuhan Jesus, lambin ididah ham ma horja hagolapan na marianan bani dirimu. Mangaku ma ham halak pardousa ham. Anggo ibasai ham Bibel, tarlobih Padan na Baru, botohonmu domma sasap dousamu, halani Kristus na dob matei mangkopkop ham.

 

Tarima kasih ma bamu Tuhan Jesus, halani holong ateimu manasap dousanami na buei in, na banggal in. Amen.

Haleluya No. 133 : 5, 6. Holong do Atei >>
5. Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.
6. Manggoluh ahu binaenni Hata
ni Tuhan Jesus bai tonduyhin.
Ai do ‘se ningku tong:
Holong do atei ni Naibatangku mangidah au.