27 Februari: “Naibatangku seng parduli bani parkarangku”

tnt_feb27_gogoh bani namasa

 

Mase ma ihatahon ho ale Jakob, mase ma iluarhon ho ale Israel : lingod do dalanku humbani Jahowa janah pakarangku domma ilaosi Naibata. (Jesaya 40: 27)

(Terjemahan baru, 1976: ” Mase ma isahapkon ham, ale Jakob, anjaha ihatahon ham, ale Israel: Ponop do dalanku humbani Jahowa, anjaha Naibatangku seng parduli bani parkarangku”?)

Bani panorang hasosakan, bani sitaronon na borat, atap hadojukon, domma homa gati hita martonggo bani Naibata, hape seng dong iahap hita pangurupi ni Naibata, seng dong naahap idop ni uhur-Ni, seng itangihon pangindoan.

Bani panorang sisonai ai ma tubuh uhur mangkatahon: Lingod do dalanku humbani Jahowa, seng be isarihon ahu, seng be ihaholongi.

Ulang lupa ham, Naibata sisadokah ni dokahni do Naibatanta. Seng dong bani halinoh ni pargolingan, holong-Ni seng marpunsa. Mase ma itutup panangar-Ni dompak tonggongku? Ra nimu tene? Tapi Naibata na pandei, botoh do atap aha na boi manogu ham hu hagoluhan na sadokah ni dokahni, janah itogu do hita hubani malas ni uhur na sadokah ni dokahni ai. Ididah do sitarononta, ibotoh do hasunsahanta, ibotoh do naija sidearan banta anggo ipindo hita partolongan humbani, ibere do gogoh banta manaron, ibere do gogoh na baru. Iopopkon do hita bani habongni. (Jes 40:31)

Anggo masa banta ari-ari na borat jolom hita ma poltik Naibata. Turi-turihon hita ma Bani sagala pusok ni uhurta. ljai ma lambin iahap hita, sedo na lupa Naibata banta, dohor do Ia banta rap pakon partolonganni. Dua do dalan na somal ibahen Naibata, anggo lang be tarporsan hita siporsanon ai. Sada, ibuati siporsanon ai, dalan paduahon itambahi gogoh banta laho manaron ai.

 

Ham Tuhan Naibata! Bere Ham ma bangku Tonduymu, ase hubotoh mangindo pangurupimu bani panorang parlajoan, atap sitaronon aha pe. Amen.

Haleluya No. 121 : 1-3. Jesus Goluh ni Tonduyhu >>
1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.
2. Jolom au Jesus Tuhanku, jolom au sai tongtong.
Ulang sirpang be naiheihu humbai dalan na sintong.
3. Bai musim ni haba-haba pinaroh ni musuhkin,
Togu au das hu labah bani parsaranan in.

Advertisements