28 Pebruari: Sanggah roh parlajoan hu banta

tnt_feb28_heb12_3

 

Ingat nasiam ma Ia na manaron buei parlawanon humbani pardousa, ase ulang haoran anjaha mandolei tonduy nasiam. (Heber 12:3)

(Terjemahan baru, “Ingat nasiam ma Ia, na manaronkon parlawanon na sonai dompaksi humbani pardousa, ase ulang marnaloja nasiam mandolei uhurnasiam”.)

Sai ipindahi halak do na jahat dompak Tuhan Jesus. Sai igompangi Parisei do Ia, atap boi tardapot Tuhan Jesus bani hatani. Tapi seng dong hatani na lepak atap na lopus. Ipakei do sagala gogohni mambahen na madear bani halak Israel.

Dob dohor panorang laho parsilangonkon Ia, itangisi ma huta Jerusalem, nini: “Ambit iarti ham ma namin bani ari on, na boi padameihon ham. Tapi ponop do ai humbani matamu.” (Luk. 19 :42). Anggo nadingat hatani dompak si Judas Iskariot, itarehon do isummah si Judas Ia, age pe ia do napatuduhkon dalan bani munsuh laho manangkapsi, nini: “Judas, panummahon do hape ibahen ho mangondoskon Anak ni Manisia in?” (Luk. 22:48). Anggo nadingat homa pamorsouon ni si Petrus, seng igilai ia, tapi ikawahkon do marhitei holong, gabe pajumpah panonggor sidea, gabe idingat si Petrus ma hata ni Tuhan Jesus, laho ma ia hu darat tangis sosombopon. Nadingat use hatani humbani hayu parsilang sedo boritni iorongkon, tapi munsuhni do itonggohon: “Ham Bapa! Sasap Ham ma dousa ni sidea, ai seng ibotoh sidea na binahenni!” (Luk 23 :34).

Ingat hita ma na tinaron ni Tuhan Jesus sanggah roh parlajoan hu banta, ase sabar hita janah ulang surut holong ni uhurta. Sai dompak Naibata ma hita mangkawah, ase margogoh hita. Tuhan Jesus ma Anak ni Naibata janah anak kasihan ni Naibata, hape itaron do sonai humbani pardousa. Porini pe roh sitaronon atap parlajoan hu banta, sedo na itadingkon Naibata hita. Idingat janah ihaholongi do hita. Tenger ma uhurta pasal ai.

 

Ham Tuhan Jesus! Maidop ma uhurmu, suruh ham ma Tonduymu bannami, ase idingat hanami Ham na manaron in sanggah roh sitaronon bannami. Amen.

Haleluya No. 119 :1 ,2. Bintang Pambobai
1. Bintang Pambobai Batu Gingging in
Tungkot sijolomon bai na landit in
Ruti hagoluhan bah na torsuk in
Alat situjuan in ma Jesus in.
Alat situjuan in ma Jesus in.

2. Ham tongon gogohku, pangajamankin,
damei ni uhur-Mu, hasonangankin
Goluh ni tonduyhu, hatuahonkin,
in ma alo Tuhan; Ham tumang do in.
in ma alo Tuhan; Ham tumang do in.

3. Anggo seng marhitei ham o Jesuskin,
ai tor humbai ise gogoh lao hujin?
Ham tarbaen paringan siporsanonkon.
Holong niarapkon; ham do Jesuskin.
Holong niarapkon; ham do Jesuskin.

Advertisements