6 Pebruari: “Tarikon-Ku do sidea Bangku”

tnt_feb6_john12_32

 

“Anggo Ahu dob ipagijang Ahu hun dunia on, arahonkon-Ku ma halak haganupan hu Bangku. Ihatahon Jesus do ai patidakkon sonaha parmatei-Ni holi”. (Johannes 12: 32, 33)

Terjemahan baru (1976), “Anggo Ahu, dob ipagijang Ahu hun dunia on, tarikon-Ku do haganup sidea Bangku. Ihatahon do ai laho patidakkon parmatei-Ni holi“.

Anggo uhur ni munsuh ni Tuhan Jesus, sai podas ma namin matei Tuhan Jesus, ase minop sagala sura-surani. Ase dob unduk panjujung ni Tuhanta mangondoskon Tonduyni, dob rotap hosahni, minop ma ninuhur ni munsuhni sagala sura-surani. Lang ibotoh sidea anggo habotohon ni Tuhanta iatas ni sagala habotohon ni manisia do. Ipatidak do rusia ai bani ayat na tarsurat iatas on. Ihatahon do: “Dob ipagijang Ahu hun dunia on”, artini dob ipagijang Ia bani hayu parsilang, dob matei la, naik ma Ia hu nagoriatas. ljai pe mamungkah panggulmiton na baru, na lobih humbani na dob in.

Paima ipagijang Tuhanta, sadokah bani goluhni, pitah bani halak Israel do Ia mangarah, taridah humbani balosni bani boru Kanaan, nini: “Isuruh do Ahu pitah hubani biri-biri na magou hun rumah ni Israel. Bosur ma lobei dakdanak. Ai seng patut buaton ruti ni dakdanak mamberehon bani baliang”.

Tapi dob isalpui Tuhan Jesus hamatean, dob puho Ia laho naik hu nagoriatas, mubah ma ranggian ai, nini dompak susianni: “Laho ma hanima, podahi hanima ma sagala bangsa ase gabe susianKu! (Mat. 28 : 19a). Otik ope taridah horja ni Tuhan Jesus paima ibolus hamatean, singgan bangsa Israel ope hansa. Tapi dob matei Ia, dob roh Tonduy na Pansing, ihamkam hata ai ma sab dunia on.

Sonaha do hita na mambasa on? Domma dihut ham iarahkon Tuhan Jesus? Domma ganup hita mar-Tuhan bani Tuhan Jesus?

Jolma na porsaya do isuruh Tuhan Jesus mangarahkon. Domma dihut ham bastu bani horja pangarahon hinatahon ni Tuhanta?

 

Ham Tuhan Jesus, sai dihut ma hanami tongon niarahkon-Mu janah dihut ma hanami gabe pangarah-Mu. Amen.

Haleluya No. 144: 3, 4. Bolag Ope na Golap In >>
3. Torang do bagah-bagah ni Bapanta i nagori atas in
Ganupan jolma iarahkon do hubani sonang ni uhur-Ni lo
4. Sai gogoh bei pasaudkon in mamboan Hata hagoluhan in
Bai ganup bangsa na i tanoh on, porlu baen hita horja in tongtong