7 Februari: “Atap aha ipindo hanima … sai jaloonnima do”

tnt_feb7_mat21_22

 
“Atap aha ipindo hanima bani tonggonima ibagas haporsayaon sai jaloonnima do” (Matus 21: 22)

Terjemahan baru (1976), “Anjaha sagala na pinindonima ibagas tonggonima, sai na jaloonnima do, anggo porsaya hanima.”

Sedo bani simbuei ihatahon Tuhan Jesus bagah-bagah ai, pitah bani susianni do. Bani susianni pe seng ihatahon sagala pinindoni dapotsi, tapi pinindoni ibagas haporsayaon ai do jaloonni.

Domma iahap ham susian ni Tuhan Jesus ham, ajar-ajar-Ni? Anggo Tuhan Jesus martonggo sedo maningon pinindoni ai saud, tapi pinindoni uhur ni Naibata do. “Tapi sedo marguru bani uhurhu, uhurmu do” (Mat 26: 39b). (Terj. baru, “Tapi seng marguru hubani rosuh-Ku, tapi marguru bani rosuh-Mu do”.) Podah ni Tuhan Jesus pe bani tonggo “Ham Bapanmi” sonai do. Sai saud ma harosuh ni uhurmu ps.

Anggo Naibata itonggor do pangindoanta ai romban hubani goluh magira ai, mardomu hujai do Ia mambalosi tonggonta atap lang. Ia ibalosi pe sedo homa mangihutkon panorangta, panorang ni Niabata do. Anggo iparomban hita pangindoanta bani pangindoan ni Tuhan Jesus, ra ma Ia mangapiti hita, mambalosi tonggonta. Tapi porlu ingatonta: Botohan do Naibata ase ham atap aha na porlu bamu, romban hujai ma pambalosini bani tonggonta, halani holong ni ateini banta.

Sanggah jongjong Tuhan Jesus i lambung tanoman ni si Lasarus, nini: “Ham Bapa, tarima kasih huhatahon Bamu, halani itangihon Ham Ahu” (Joh. 13 :41). Lape iluarhon pangindoanni, domma iahap ibalosi Naibata Ia.

Sai iurupi Naibata ma hita, ase lambin romban pargoluhonta pakon harosuh ni Naibata. Ai lambin sada hita pakon Naibata, lambin harosuh ni Naibata gabe harosuhta, sura-sura ni Naibata gabe surat-suranta, pangindouan ni Naibata gabe pangindouanta. Anggo sonai ibere Naibata ma pinindonta ibagas hap, ai tujuan ni pangindouanta pasaud harosuh ni Naibata, ase marsangap Naibata marhitei hita.

 

Ham Tuhan Naibata, tarima kash ma Bamu, ai ra do Ham magajari martonggo na sintong. Sai iurupi Tonduymu ma ase sintong tonggonami hu Bamu janah malas uhur-Mu mambalosi. Amen.

Haleluya No 81: 3, 4. Ham Pangapoh na Tarlobih >>
3. Ham isombah uhurnami, holong atei-Mu in pabayu hanami.
Lambin sah ma patandahon jangin ni dousa in, sai tong tundalonkon.
4. Sai patorang Ham bannami marsik ni Jesus in, haluahonnami.
Sai pintor ma uhurnami binaen ni daroh ni Jesus Tuhannami.