8 Pebruari: Holong Nagoriatas

tnt_feb8_holong nagoriatas

 

Ulang ma marutang nasiam age bani ise, sobali na marsihaholongan”. (Roma 13: 8)

 

Bani ayat 7 ihatahon apostel ai: “Galar nasiam ma bani ganup na patut, na patut utang nasiam: Balasting bani na patut manjalosi, sohei bani sijalo sohei, kahormaton bani na patut hormaton, sangap bani na patut pasangapon”.

Susian ni Tuhan Jesus ulang marutang-utang duit age barang, age bani ise halak. Tapi dong utangni na maningon marnunut galaronni, ai ma utang holong, nagalar pe seng ra salosei, ai hadirion ni halak Kristen do holong ai, ningon parholong ai songon Tuhanni Tuhan Jesus parholong banggal ai. Songon bah tubuh na marsual-sual do holongni ai, seng ra bois. Ase sadokah hita manggoluh do holong ai. Panggalar ni utang holong ai pe pargoluhonta do, ai holong do uhurta atap bani ise hita marsaor do, halak na mardomu pakon hita.

Seng marbolat-bolat haholongon ai. Ningon haholonganmu do hasomanmu doskon dirimu, sonai do hata ni Naibata, seng tarsuhati ai, holong bani diri do suhat-suhatni.

Anggo ididah ham ibagas uhurmu sonaha isi ni holongmu dompak Naibata ampa dompak hasoman jolma, tarahap do sepe gakni hita susian ni Tuhan Jesus. Paruntolon banggal do banta laho mangkaholongi na manunsahi hita. Ongga do ipindo ham humbani Naibata ase ibere bamu holong na pitah ai (agepe)?

Holong dunia on buenan do ai marpangkaut (holung atap helung). Torihon songon na holong uhurni marhitei hatani atap pambahenanni, hape dong do tinembakni, dong tinatapni.

Pindoonta na hubani Naibata, ase isuan hu banta holong na humbani Naibata, ase tubuh janah lambin banggal holong ai ibagas uhurta, gabe goluhta gabe hadirionta.

 

Ham Tuhan Naibata Bapanami! Suan Ham janah patubuh Ham bannami holong nagoriatas ai, patubuh Ham janah pabanggal Ham ibagas uhurnami, ase gabe parholong na sintong hanami. Amen.

Haleluya No. 133 : 8, 9, 12. Holong do Atei >>
8. Tobu do holongni Tuhanku,
na pasabouhon paruhurhon.
Ai do ‘se ningku tong:
Holong do atei ni Naibatangku mangidah au.
9. Ai ipamalum haholongon-Ni
ganupan sahitni uhurhon.
Ai do ‘se ningku tong:
Holong do atei ni Naibatangku mangidah au.
Holong do atei ni Naibatangku mangidah au.
12. Sai pujionku do uhur holong,
ni tinuduhkonni Naibata.
Ai do ‘se ningku tong:
Holong do atei ni Naibatangku mangidah au.