9 Februari: “Mase bungbang uhurmu”?

tnt_feb09_mat14_31b

Ho siotik haporsayaon, mase bungbang uhurmu? (Mateus 14: 31b)

Sonai ma hata ni Tuhan Jesus dompak si Petrus, sanggah na laho manongnong ia mardalan iatas bah laho mangayaki Tuhan Jesus na mardalan iatas bah (tao) ai.

Dob itamuei Tuhan Jesus lima ribu halak i dipar ni Tao Galilea, hunlobei ma susianni isuruh mulak marparau hu Kapernaum. Dob ai isuruh ma na mabuei misiran. Tangkog ma Tuhan Jesus sahalaksi hu dolog martonggo. Ase dob bod ari sahalak Tuhan Jesus mando tading, parau ni susianni domma daoh marlajar. Matele tahuak dayok roh ma Tuhan Jesus mangayaki sidea (parau) ai mardalan iatas bah ai.

Dob ididah na i parau ai roh jolma mardalan iatas bah ai, bajoraon ma sidea iagan begu na matei. Isosak logou pakon mandoraki ma homa sidea. Gabe rusak janah bajoraon, mandoraki ma sidea ibahen biarni. Mintor iparsahapkon Tuhan Jesus ma sidea: “Tenger ma uhurnima, Ahu do on, ulang hanima mabiar”! Mintor marsampang Petrus: “Anggo Ham do in Tuhan hatahon Ham ma ahu roh mangajaki Ham mardalan iatas bah on“. “Hayop ma!” nini Tuhan Jesus. Mintor susur ma Petrus humbani parau ai janah mardalan mangajaki Jesus. Tapi dob ididah gilumbang pakon doras ni logou, laho manongnong ma ia, nini ma: “Tuhan paluah Ham ahu”! Balos ni Tuhanta, ai ma ayat na iatas in.

Siusihan do Apostel Petrus: Dob ibogei hata ni Tuhan Jesus mintor itandai do janah mintor porsaya botul do ia. Tenger do uhurni mandalankon hata ni Tuhan Jesus, age na so boi bahenon ni jolma (mardalan iatas bah). Mintor iahap na laho manongnong ia. Mintor idilo Tuhan Jesus: Tuhan paluah Ham ahu.

Age pe ihatahon Tuhan Jesus ia siotik haporsayaon, tapi dong do haporsayaonni. Anggo bungbang uhurta bani hata ni Tuhan Jesus (hata ni Naibata) tandani otik ni haporsayaon do ai. Tapi ididah hita, sonai pe tenger ni uhur ni Apostel Petrus mangayaki Tuhan Jesus, pala mardalan iatas bah ia, tapi tong do ia siotik haporsayaon tene, halani bungbang ni uhurni.
Ham Tuhan Jesus! Urupi Ham ma hanami ase ulang bungbang uhurnami bani hatamu, tapi ase totap tenger uhumami. Amen.

Haleluya No. 121: 1-3. Jesus Goluh ni Tonduyhu >>
1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.
2. Jolom au Jesus Tuhanku, jolom au sai tongtong.
Ulang sirpang be naiheihu humbai dalan na sintong.
3. Bai musim ni haba-haba pinaroh ni musuhkin,
Togu au das hu labah bani parsaranan in.