1 Januari: “Domma Tarsurat Gorannima”

tnt_jan1.jpg

 

On ma lah hamalaskon hanima: na dob tarsurat gorannima i Nagori Atas. (Lukas 10:20)

Na isuruh Tuhan Jesus do susianni dua-dua halak mangganupi huta-huta ni Israel. Ibagas malas ni uhur do mulak na pitu puluh in mangkatahon: Tuhan, gari setan-setan manombah bannami halani Goranmu (Luk 10: 17).
Balos ni Tuhanta: “On ma lah hamalaskon hanima, na dob tarsurat gorannima i Nagori Atas“. Ibotoh Tuhan Jesus do, anggo manjadi horja ni halak tubuhan malas ni uhurni.

Malas ni uhur do gati salih gabe gijang ni uhur. Sijagaon do ai. Anggo dong malas ni uhurta, laho ma uhurta bani na mambere atap na manumpaki atap na masu-masu ase dong malas ni uhurta ai. Anggo sonai tubuh ma uhur tarima kasih pakon uhur puji-pujian. Daoh ma gijang ni uhur.

Ia malas ni uhur tanoh on, tarpatudos do hubani malas ni uhur ni na bagodon (na mabuk), anggo sanggah bani gurgur ni siinumon ai songon aha pe lang na hurang ni na mabuk ai. Tapi dob bois gurgur ni siinumon ai, bois ma homa malas ni uhurni ai.

Ipindo uhur ni Tuhan Jesus ase ihamalaskon uhur ni susianni malas ni uhur na totap, malas ni uhur na so marnamangadi, malas ni uhur sadokah ni dokahni. Dihut do susian sonari (Kristen) simada hata ai. Ase ihamalaskon hita parmasukta hu nagoriatas. Ai domma, ihopkop Tuhan Jesus hita, domma igalar utang dousanta, domma isasap dousanta, domma ipadamei hita pakon Naibata, domma ipadomu hita pakon Naibata marhitei Tuhan Jesus Kristus. Jadi bani ujung goluhta boanon-Ni ma hita hu nagoriatas, ai domma hita bani daptar sipagoluhon.

Malas ni uhur ai ma manggoki uhurta ibagas pardalananta i tanoh on, ibagas na manjuang ope.

 

Ham Tuhan Jesus! Paahapkon Ham bani uhurnami marhitei Tonduymu pangkopkoponmu bannami, ase totap haporsayaonnami janah poltik pangarapannami: Na dob tarsurat gorannami bani daptar sipagoluhon-Mu halani idop ni uhurmu. Amen.

Haleluya No. 170 : 1,2: Sai Nagori Atas Do >>
1. Sai nagori atas do situjuaon ni uhurta;
Ai na manginsolat do hita i nagori tongah.
Pardagangan tanoh on, surga hasusuranta in.
2. O tonduyhu, tatap ma, surga in, hasusuranmu.
Tanoh on tundalhon ma seng talup in iananmu.
Surga do tujuan ni na torang maruhur in.

Advertisements