10 Januari: Dilo-dilo Horja Zending (Pekabaran Injil)

tnt_jan10_zending

 

Mandipar ma ham hu Makedonia mangurupi hanami! (Lahoan 16: 9)

Apostel Paulus ma sada halak na tangi bani hata ni Naibata pasal horjani. Bani na saborngin ididah ma bani panonggoranni (alamatni) jongjong sada halak Makedonia mantaurhon hata na iatas in hun Makedonia (Aropah), Apostel ai pakon hasomanni sanggah i Asia na Etek ope, idiparni ma jolma na martaur ai, nagori ni sipajuh begu-begu, seng ope dong na porsaya bani Tuhan Jesus ijai.

Porlu do puho uhur ni hita halak Kristen mambogei taur-taur ni sipajuh begu-begu hun dipar ai, humbani ugama sapari ai, dompak ganup hita halak Kristen na porsaya bani Tuhan Jesus: “Mandipar ma ham mangurupi hanami”!

Anggo Apostel Paulus pakon hasomanni mamintor do iuhurhon laho hu Makedonia, ai iahap sidea Naibata do marsuruh sidea mangambilankon ambilan na madear hujai.

Sonaha do ham, hita? Iahap uhurmu do hasoman na ibagas ugama sapari ai mangindo partolongan bamu? Porlu ma puho uhurta manaksihon haporsayaonta ai bani hasoman na so mananda Tuhan Jesus ope. Lang pala maningon mandipar ham, sai adong do parjumpahanmu pakon na so mananda Tuhan Jesus ope, patugah ham ma na hinaporsayaonmu ai. Seng ganup jolma pandei marambilan, tapi haganup do jolma boi patugahkon hinaporsayaanni.

Ongga do ham dihut bani odoran ni na marambilan hu huta ni sipajuh begu-begu? Sonaha do uhurmu anggo masa pesta zending atap mandurung (manggalang, admin) hubani horja zending? Dihut do ham parutang ijai? Tontu taridah do ai bani sibere-beremu. Anjaha ididah Tuhanta do ai.

 

Ham Tuhan Jesus! Puhoi Ham ma uhurhu ase huahap na dihut do ahu parutang bani parrarat ni Harajaonmu. Amen.

Haleluya No. 144: 1, 4: Bolag Ope na Golap In >>
1. Bolag ope na golap in, bai bangsa na iatas tanoh on,
Sibolis do na manrajai in, isombah halak begu-begu in
4. Sai gogoh bei pasaudkon in mamboan Hata hagoluhan in .
Bai ganup bangsa na i tanoh on, porlu baen hita horja in tongtong .

Advertisements