12 Januari: Mandalankon Harosuh ni Naibata

tnt_jan12_harosuhninaibata.jpg

 

Ganup na mangkorjahon pinindo ni uhur-Ni in (Naibata), botohonni ma barang na humbani Naibata podah-Ku barang na Huhatahon in humbani uhur-uhur-Hu tumang. (Johanes 7: 17)

Anggo dong na manungkunkon: Sonaha do ase hubotoh paboa Anak ni Naibata do Tuhan Jesus? Ase hubotoh na sintong do Podahni? Balos ni Tuhan Jesus bani sungkun-sungkun na sonai ai, ai ma ayat na iatas in.

Hun lobei sungkunon ma: Aha do harosuh ni Naibata? Harosuh ni Naibata, ningon borsih uhurta, hatanta pakon pambaenanta. Harosuh ni Naibata ningon holong uhurta bani ganup jolma, ai nini: Haholongi hanima ma munsuhnima, tonggohon ma halak na marburu hanima (Mateus 5: 44).
Mintor pungkah ham manjaga uhurmu, mintor ididah ham ma atap na borsih uhurmu atap na madear. Pungkah ham ma mambahen na madear dompak na mandomdomi ham atap na manrugihon ham. Ipindo Naibata ningon sintong uhurmu ibagas, hatamu pakon pambahenanmu. Nunut ham mangkorjahon harosuh ni Naibata, ijai ma jumpah ham balos ni sungkun-sungkunmu.

Mandalankon harosuh ni Naibata, ai ma dalan hubani Kristus. Hunjai ma nabotoh isini podah ni Kristus na humbani Naibata do. Ai seng dong manisia na mamodahkon podah sonai suharni. Anggo munsuh siimbangon do, sibunuhon do, age tabas ni datu pe “surung bunuh ma ho munsuhku”.
Ingat hita ma tonggo ni Tuhan Jesus bani hayu parsilang ondi: Ham Naibata, sasap Ham ma dousa ni sidea, ai seng ibotoh sidea na binahenni. Sedo naboritni iorongkon Tuhan Jesus, uhum na laho roh bani halak ai do ididah, ulang namin saud uhum ai, ai do ase ipindo hasasapani humbani Naibata.

 

Ham Tuhan Naibata! Bare Ham ma bangku gogoh pakon ringgas ni uhur mandalankon harosuhmu. ase tangkas hutandai Anakmu Jesus Kristus Sipaluah hanami. Amen.

Haleluya No. 130 : 1,3. Ai Domma Jumpah Au Ondolan >>
1. Ai domma jumpah au ondolan ni tonduyhin na magou on
Daroh ni Jesus do manahan sadokah ni dokah ni in.
Maseda pe dunia on, tongtong togap ondolan on.
3. Ulang maseda hajolmaon, ninuhur ni Jahowa in;
Isuruh do bai hajolmaon, Anakni Sipagoluh in.
Sai ihartuki Hata-Niin do labah ni uhurta in.

Advertisements