13 Januari: Magouan Jesus

tnt_jan13

 

Mase sonai pambahenmu bannami anaha? Rusak do uhurhu pakon bapamu mangindahi ho! (Lukas 2 : 48)

Buei do namatoras na songon si Josep pakon si-Maria magoan Jesus. Domma itanda Tuhan Jesus Sipaluah bani janah malas uhurni rap pakon Tuhan Jesus. Tapi dobni laho ma uhurni mangkirahon na marbagei-bagei bani goluh on, mangkirahon sipanganon, parhiouon, rumah, hasoman satangga, niombah, on pakon an. Ai ma mangisi uhurni, magou ma Jesus humbani pamingkiranni.

Ra do homa halani malas ni uhurni bani goluh on, marhullot uhurni bani na i dunia on, seng sompat be dompak babou. Tibal tohang (horisontal) mando pardalan ni uhurni, lang sompat be sirdok dompak datas (vertilkal). Sisonai lupa ma mandingat Jesus, lang be iparsahapkon Tuhan Jesus, lang idingat be martonggo hu Bani. Ari-ari roh daohni ia humbani Tuhanni, domma magou Jesus humbani pardingatanni. Magou ma homa malas ni uhurni ibagas goluh on.

Porlu tarjolma halak sisonai ai, ase iahap na dob magoan Jesus ia. Sonaha ham domma magoan Jesus ham? Domma gati ham lupa Bani, ipindahi ham do malas ni uhur i dunia on? Seng idingat uhurmu be Jesus?

Sai tarjolma ma ham ase mulak pandingatmu bani Jesus, Sipaluah Sipagoluh in, ase mulak marmalas ni uhur ham ibagas Jesus. Ipaima-ima do ham tong age pe lupa pardingatmu Bani, seng lupa pardingat-Ni bamu. Ra do Ia use marhuan-kuan pakon ham. Martonggo ma ham hu Bani. Sopotkon ham ma na dob lepak ham pala lupa mardingat-Si, ase isasap dousamu. Basai ham ma Hatani, mandoding ma ham mamuji-Si.

Ham Jesus Sipaluah! Paridop ni uhur banggal do Ham. Urupi Ham ma ahu ase jumpah ahu Ham janah manggoluh rap pakon Ham. Urupi Ham ma ahu ase ulang maluah ham humbagas uhurhu. Amen.

Haleluya No 117: 1, 2. Pitah Jesus Hubaen Hasomanku >>
1. Pitah Jesus hubaen hasomanku
Ia do na pasonangkon au
Ningon sai tongtong torang langkahku
anggo rapkon Jesus in au lao
anggo rapkon Jesus in au lao.
2 . Tanoh pakon laut sonang hu bontas,
anggo sai iiring Jesus au.
Hu nagori atas pe sai torus,
do boanon ni Tuhanku au,
do boanon ni Tuhanku au.