14 Januari: Manjalo Harajaon ni Naibata Songon Dakdanak

tnt_jan14_mar10_15

 

Na sintong do hatangkon bannima: na so manjalo Harajaon ni Naibata songon dakdanak, tontu seng saud ia hubagas (Markus 10: 15).
Terjemahan baru, “Na sintong do hatangkon bannima: Na so manjalo harajaon ni Naibata songon dakdanak, seng anjai masuk ia hujai” (Markus 10: 15).

Dakdanak pakon na magodang legan bei do rumangni marpingkir. Dakdanak saluju do; na magodang domma buei partimbangni. Anggo naajarhon pasal harajaon ni Naibata, pakon pasal Naibata pakon Tuhan Jesus Anak ni Naibata na marholong ni uhur bani hita jolma, ijalo uhur ni dakdanak do ai, ihaporsayai do. Anggo napodahkon: Anggo martonggo hita hu Bani, itangihon do hita, ijalo uhurni do ai, seng pala manungkun uhurni songon hita na magodang: Tongon do ai nani? Podah ni Tuhan Jesus banta laho manjalo harajaonn ni Naibata, ningon songon paruhuron ni dakdanak paruhuronta.

Ningon ihaporsayai uhurta hata ni Naibata, sedo sitimbang-timbangonta: sintong do ai nani atap lang? Ningon mintor ijalo uhurta: Na sintong do harajaon ni Naibata seng sipasintongon mangihutkon hata ni Naibata.

Anggo sihol masuk hita hu harajaon ni Naibata, ningon saluju uhurta manjalo Naibata gabe Rajanta, Raja ni uhurta, Raja ni tonduyta pakon Raja ni badanta. Halani ai maningon iahap hita lobihan songon parentah (aturan) ni raja pamarentah na i tanoh on parentah ni Naibata. Naibata ma Rajanta mamarentah uhurta, rayat (siminik) ni Naibata ma hita. Warganegara surga do hita homa na masuk hubagas harajaon ni Naibata.

 

Ham Tuhan Jesus! Urupi Ham ma hanami, ase songon dakdanak hanami manjalo Harajaonmu, ase songon dakdanak hanami roh hu Bamu manjalo Harajaonmu, mangihutkon Hatamu. Amen.

Haleluya No. 123: 1, 6, 7. Hu Nagori Atas do >>
1. Hu nagori atas do pardalanta in.
Ganup na pininta lo dapot ma ijin
Anggo ijon mubah-ubah do ganup,
seng sadiha na talup, i tanoh on.
6. Hu nagori atas in lao ma hujin;
Gari hamateian in parhiteian do.
Ididah ho ujung nidalanta in,
rumah ni Bapanta in i surga in.
7. I nagori atas in hasonangan in;
Rap mandoding ma ijin na porsaya in.
Haleluya! In do ilolobkon bei!
Bai Jesus parmonang in. Haleluya!

Advertisements