16 Januari: Mananda Harosuh ni Naibata

tnt_jan16_rum12_2.jpg

 

Ulang ma gabe sarupa nasiam pakon dunia on, tapi paubah ham ma rupamu marhiteihon habayuon ni uhur, ase boi itanda nasiam naija harosuh ni Naibata, ai ma pasal na madear harosuh pakon na gokan dear. (Roma 12: 2)
Terjemahan baru: ” …. ulang ma sarupa nasiam pakon dunia on, tapi mubah ma marhitei habayuon ni uhur, ase boi nasiam manimbangi atap aha do rosuh ni uhur ni Naibata, ai ma na madear, harosuh ampa na gokan dear”.

Na hun dunia on do hita, uhurta pe uhur dunia on hinan do. Tapi dob idilo Naibata hita hubagas Harajaonni ningon legan ma hita, lang sarupa pakon dunia on, ningon tukar, marubah ma uhurta ase boi itanda, ibotoh hita harosuh ni Naibata.

Lang boi ibahen hita ai, Naibata boi do ibahen. Halani ai pindoonta ma hubani Naibata: “Tompa Ham ma uhur na bayu bangku janah pabayu Ham tonduy na totap ibagas ahu! (Psalmen 51:12)” Dob ibere Naibata banta uhur nabayu gabe dapot iarti hita naija harosuh ni Naibata.

Tapi seng sungkup santorap hansa hita marubah uhur, ningon ari-ari do mangindo pakon manjalo uhur nabayu ai, ai ari-ari do roh dousa ai dalit ibagas uhurta, jadi ari-ari ma lambin itanda hita lambin ibotoh hita harosuh ni Naibata.

Tontu manungkun uhurta ibagas: Ai boi do ahu pardousa na galek on gabe mangarusi harosuh ni Naibata? Tongon do ai, tapi roh ma ham bani Naibata, sai urupanni do ham. Nini Apostel Paulus: Seng pandei hanami humbani dirinami atap mamingkiri humbani dirinami sandiri. Hapandeannami roh humbani Naibata do.

Anggo iahap ham nape itompa Naibata bamu uhur nabayu ai, ulak-ulak ham ma pindo ham: “Tompa ham ma uhur na borsih bangku janah pabayu Ham tonduy na totap ibagas ahu!” Pindo ham ma Tonduy na Pansing manggoki ham.

 

Ham Tuhan Naibata, Bapanami na i nagoriatas! Tompa Ham ma uhur na borsih janah pabayu Ham tonduy na totap ibagas ahu, ase boi hudalankon harosuh ni uhurmu. Amen.

Haleluya No. 81: 1, 2: Ham Pangapoh na Tarlobih >>
1. Ham Pangapoh na tarlobih, Tonduy ni Tuhan in, uhurhin masuki.
Iparbagah Tuhan nami, ningon Ham do na roh mangajar hanami.
2. Seng adong pambotohnami na dear, na torang humbai dirinami.
Ningon Ham do manondangi uhur ni jolma in, jaha manorangi.