19 Januari: Manogu-Nogu Dakdanakta Hu Bani Naibata

tnt_jan19_dakdanak_pagodang.jpg

 

Dong ma na mamboan dakdanak hu Bani (Tuhan Jesus) ase ijamah. (Markus 10:13)

Ganup do hita urangtua masihol ase ipasu-pasu Tuhan Jesus niombahni. Domma iboan ham niombahmu bani Tuhan Jesus? Tontu on do balosmu: Girah do huboan bani Tuhan Jesus, hira sabulan dob tubuh mintor huondoskon do bani pandidion na pansing in. ljai ma tardidi ia hubagas goran ni Naibata Bapa, Anak pakon Tonduy na Pansing.

Tongon do ai. Tapi seng sungkup singgan jai, ningon boanon do tong dakdanak in bani Tuhanta marhitei tonggonta. Ambah ni ai anggo lambin banggal ma dakdanak in pingkiron do atap sibar ja ma tarjalosi hata ni Naibata, atap sibar ja ma na boi ijalo pasal ni barita ni Tuhan Jesus. Naturi-turihon ma porini hadakdanakon ni Tuhan Jesus, bujur ni mambalosi namatorasni. Suanon ma ase holong uhurni bani Tuhan Jesus anjaha ra ia pasangapkon-Si, mangidangi-Si. Pindoonta do Tonduy na Pansing ase iajari janah iurupi hita manogu-nogu dakdanakta hu bani Naibata.

Ra do iahap ham songon na mamaholtu patorangkon pasal Tuhan Jesus bani niombahmu, tapi pasal-pasal na legan sai ihatahon ham do bani sidea. lbere ham do niombahmu mangan ase podas marganjang janah barah marbanggal. Tapi ra gati lupa hita mambere balanja ni tonduy ni, ampa uhurni ase roh banggalni homa songon angkulani ai. Gabe marsiteldaki (tdk sama, tdk ada pasangannya, tdk sejalan) ma pambahenta dompak niombahta in.

Pangindo ham ma bani Naibata ase iurupi ham pagodang-godang daging pakon tonduy ni dakdanak in. Roh banggalni angkulani roh torsani homa hauhuronni. Sidingaton ni namatoras pakon sagala na mangajari dakdanak ma: Ningon ihagoluhkon hita do niajarhonta ai, ningon siihutkon Tuhan Jesus do hita, tarahap do ai bani dakdanak niajaran ai.

 

Ham Tuhan Naibata! Maningon boanonnami do dakdanaknami hu Bamu. Sasap Ham ma dousanami pasal ai. Suruh Ham ma Tonduymu bannami, use iajari ahu mamboan dakdanak in hu Bamu. Amen.

Haleluya No. 194: 1- 3. Sai Sihol Usihanku >>
1. Sai sihol usihanku ham Jesus Tuhankin
Bai toruh ni uhur-Mu lamlam ni Hata-Mu.
Sonaha bahenonku lao mandalankon in
Sai ham ma alo Tuhan manolong ai ijin.
2. Sai sihol usihanku Ham Jesus Tuhankin.
Ganupan ningon saud Titahni bapa in.
Sonaha bahenonku lao mandalankon in
Anggo lang Tuhanku manolong au ijin.
3. Sonaha bahenonku maniru Tuhankin
Gok dousa do uhurhu age angkulangkin.
Urupi au, o Jesus sai sasap dousangkin.
Suanhon bai uhurhu holong ni atei-Mu.

Advertisements