2 Januari: Martuah Ma Na Martenger ni Uhur Bani Naibata

tnt_jan2_pahamotnaibata.jpg

 

Ulang ham mabiar Ahu do hasomanmu! Ulang ham rusak Ahu do Naibatamu. Hupargogohi ma ham huurupi ma ham hutumpaki ma ham marhitehon tangan-Ku siamun hapintoron ai. (Jesaya 41: 10)

Sonai ma sahap ni Naibata dompak niombahni na ibagas pusok ni uhur atap sitaronon. Ai ra do lupa sidea bani Naibata na mangurupisi. Lupa ia mardingat Naibata, na boi mangurupisi mintor idingat hasoman jolma na boi mangurupisi.

Porlu ingatonta Naibata na ra janah na boi mangurupi hita sanggah porlu ni partolongan banta. Tuhan Jahowa do hasomanta, itumpaki do hita marhiteihon tangan siamun-Ni. Hu Bani ma hita mangkawah, ulang mamintor hu bani jolma parhitean ni partolongan ni Naibata.

Partolongan ni Naibata do na porlu idahonta bani sagala pangurupion na roh hu banta. Sopotkon hita ma bani Naibata lanseita na dob in martenger ni uhur Bani ronsi hurang ni haporsayaonta, ase isasap. Pindoonta homa bani tonggonta ase ipargogohi hita, ipatoguh haporsayaonta, ase Ia ipahamot hita na boi mangurupi hita bani sagala hahuranganta pasal na porlu bani badanta ampa tonduyta.

Martuah ma halak na martenger ni uhur bani Naibata, anggo ipahamot ipanalom Naibata manumpakisi. Lape roh panumpak-Ni ai domma sonang uhurni bagas, halani na dob naondoskon hu Bani isini uhur diri rap pakon sagala hasunsahanni.

 

Ham Tuhan Naibata Bapanami na i nagoriatas! Parholong ni uhur banggal do Ham bannami. Tapi Tuhan gati lupa hanami mardingat holongmu na banggal ai, gati hurang haporsayaonnami. Sasap Ham ma hurang ni haporsayaonnami, hurang ni tenger ni uhurnami Bamu. Siminikmu do hanami. Sai ra ma hanami mangindo pangurupi-Mu tongtong. Amen.

Haleluya No. 153: 2, 3: Ondoskon Haganupan >>
2.Ningon tenger uhurmu mardingat Tuhan in.
ijin ma jaloonmu na pinarsintamin.
Ai lang adong gunani, age marhoru ho:
Tonggomu do dalanni ase jumpahan ho,
3. Ibotoh Naibatanta na porlu banta bei,
na dear roh hu banta rnambahen sirsir bei
na dear ipatudu tongtong hubanta on.
Na dorsa ipadaoh manjaga hita on .

Advertisements