23 Januari: On ma masa bani halak na manjalo Jesus

 

“Domma salpu pangabak sapari, domma gabe na baru”. (2 Korintus 5: 17)
Terj baru (1976) “Domma salpu sisapari, tonggor ma, domma gabe na baru”.
Hata na iatas on ma masa bani halak na manjalo Tuhan Jesus gabe Sipaluah janah Sipagoluh bani.

Pingkir hita ma si Sakeus. Seng sonang uhurni halani dousani janah mabiar ia mangidah Naibata. Dob roh Tuhan Jesus mamboan hasasapan ni dousani hu bani, mamboan pardamean dompak Naibata, gabe salpu ma sisapari ai, gabe marmalas ni uhur ma ia, lang be bulinsah uhurni, lang be mabiar. Domma margantih paruhuronni. Sapari holong do uhurni bani duit, ai ma ase mangkaut do tong uhurni. Dob mubah ra ma ia mambere artani bani na masombuh. Sapari dirini do na ipingkirhon, sonari na legan ma. Sagala na niakal-akalanni (tinipuni) ra do ia marditoruh manggalar ai ompat-lipat. Dob iahapkon holong ni atei ni Naibata dompaksi marholong ni atei ma ia dompak na legan, marpingkir ma ia pasal na legan. Nini Tuhan Jesus dompaksi: Jumpahan tuah ma sin rumah on sadari on. Tongon ma bani goluh ni sijalo sohei ai, domma salpu pangabak sapari, domma gabe na baru.

Domma iahap ham pargolingon ni hauhuronmu? Domma ijalo ham Jesus songon panjalo ni si Sakeus? Domma ijalo ham hasasapan ni dousa ai? Domma mardamei ham pakon Naibata? Domma ihaholongi ham Naibata na mangkaholongi ham? Domma ihaholongi ham hasoman jolma na so iparduli ham hinan? Domma ipindouhon (itonggohon) ham ase itompa Naibata tonduy pakon uhur na bayu ibagas dirimu? Ase salpu sagala hauhuron pakon ulah sapari, ase gabe nabayu hajolmaonmu?

Balosi ham ma sungkun-sungkun in sada-sada ibagas bulat pakon tongon ni uhurmu!

 

Ham Tuhan Naibata Bapanami marhitei Tuhan Jesus Kristus! Tompa Ham ma uhur na borsih ampa tonduy na totap ibagas diringku! Amen.

Haleluya No. 149: 1. Ham Sipagoluh Au >>
1. Ham Sipagoluh au parayak Ham au on.
Sai ulang Ham mandaoh humbagas uhurhon.
Roh Sipagoluh roh tongon, baen Ham au Anak-Mu tongon
Bani daroh-Mu usah au, putih songon bunga ma au
Putih tongon, putih tongon,
bani daroh-Mu usah au, putih songon bunga ma au.

Advertisements