25 Januari: “Dihut do Jesus iontang hubani horja ai”

tnt_jan25_jesus_jabu_pasu2.jpg

 

Dihut do Jesus ampakon susianni iontang hubani horja ai”. (Johanes 2: 2)

Atap halani hasomalan pe atap humbani pongkut ni uhur Kristen, tarhatahon ipio halak do Tuhan Jesus hu jabuni bani mungkah ni parjabuonni. Dob manjalo pasu-pasu i gareja, masa ope partonggoan i rumah mambogei hata ni Naibata janah mandoding sonai homa martonggo hubani Naibata.

Tapi sonaha do pangalamanmu ibagas rumah-tangga nasiam? Igoki malas ni uhur do nasiam atap gatian igoki pusok ni uhur? Rumah-tangga atap jabu na pinasupasu ni Tuhan Jesus, gati do tarbogei malas ni uhur. Ai anggo dong na hurang torsa atap na geor i jabuni mintor ipadas do bani Tuhan Jesus ase ipatorsa. Roh do Tuhan Jesus marhiteihon hatani pakon Tonduyni.

Tapi gati rumah-tangga lupa marhasoman Tuhan Jesus bani pardalanan ni goluhni ari-ari, ai do mambahen lang sonang.

Anggo iahap ham hurang ni pardomuanmu pakon Naibata age pakon hasoman jolma, ingat ham marpio Tuhan Jesus, ra do ia patorsahon. Botoh ham ma rumah-tangga na marhoru, boi do salih gabe tamah-tangga na marmalas ni uhur ibahen Tuhan Jesus, songon na taridah bani na marunjuk i huta Kana in. Na marsiboritan uhur hinan boi do ibahen gabe marsihaholongan.

Mase ma lang ra hita marpio Tuhan Jesus ase ipatorsa tongah-jabunta, ase ipatorsa hutanta ampa kuriani na i hutanta in? Anggo ipungkah ham marsaor pakon Tuhan Jesus iahap do pasu-pasu-Ni hu bamu pakon bani nasiam na sajabu. Toruskon ham ma sonai ase torus ham ipasu-pasu Tuhan Jesus. Gabe torus nasiam ibagas malas ni uhur pakon haholongon. Na manjamai Tuhan Jesus, seng paturutonni, seng tadingonkonni. Tapi iiankon Tonduyni ma hita gabe marpasu-pasu ma itongah jabunta.

 

Tarima kasih ma Bamu Tuhan Jesus, halani ra do Ham rapkon hanami bani pargoluhonnami ari-ari janah mamasu-masu hanami. Amen.

Haleluya No. 105: 1, 3. Hanami Na Satangga on >>
1. Hanami na satangga on, ilobei-Mu, o Jesuskin
Ham ihutkonon nami
Ham ma ompungni hanai on, sadokah na marhosah in,
sai pasu Ham hanami
Ham ma Raja, ihutonkon pangguruan sisungkunan
Tong bai Hata-Mu, o Tuhan
3. Rajai ham hanai tongtong, pasorap Ham bai uhurhon
gok damei uhurnami
Marhiteihitei Tonduy-Mu, iankon uhurnai ganup
patoguh Ham hanami
Daoh ma, daoh ma, partinggilan, humbennami haganupan
Damei ma jolomannami