31 Januari: “…jadi mintor ipatugah ma ai bani Jesus”

tnt_jan31_manonggohonhasoman.jpg

 
Tibal do anturang ni si Simon, panepaneon ia, jadi mintor ipatugah ma ai Bani (Tuhan Jesus). (Markus 1: 30)

Haluar hun Sinagoge, laho ma Tuhan Jesus rap pakon susianni: si Jakobus, si Johannes, si Simon pakon si Andreas hu rumah ni si Simon. I rumah ai tibal do anturang ni si Simon, panepaneon. Mintor ipatugah si Simon ma ai bani Tuhan Jesus. Mintor ipatugah bani Tuhan Jesus na masa i rumahni.

Sonaha do ham pakon sinrumahmu? Mintor isahapkon ham do bani Tuhan Jesus na masa i rumahmu? Haboratan pasal angkula atap haboratan pasal uhur pe, pasal parinangonmu atap pasal paramangonmu, atap pasal dakdanakmu? Mintor ipatugah ham do bani Tuhan Jesus?

Guruhon hita ma ai humbani si Simon! Seng ibotoh hita atap aha na madear sipindoonta, tapi ibotoh hita do na masa banta, boi torang ipatugah hita bani Tuhanta. la do na mambotoh aha sibahenon-Ni banta, sai bahenon-Ni do na dear banta.

Dear ma anggo ipatenger hita uhurta mangkatahon: Romban bani harosuhmu ma bahen Ham bannami. Ambah ni ai gatian na porlu bani parangkulaon hansa ipindo hita bani Tuhanta, tapi hurang pasal na porlu bani hauhuronta, na porlu bani tonduyta.

Porlu do age na bani goluh parsatongkinan on, tapi daoh porluan na bani hagoluhan sadokah ni dokahni ai. Pindoonta ma porini: Ase ulang mardousa hanami na sajabu on.

Juakjuakni do ipatugah komandan ai bani Tuhan Jesus. Ise do sindohormu atap hasoman parhorja atap pagori kuria in sitonggoonkonmu bani Tuhan Jesus? Kopalamu atap urangmu atap hasomanmu pe? Ahaponkonmu do lambin tambah pasu-pasu ni Naibata bamu dob ipatugah ham, dob itonggohon ham hasomanmu bani Tuhanta.

 

Tarima kasihma Bamu Tuhan Jesus, halani boi hanami mansuhutkon bani sagala na masa bannami. Amen.

Haleluya No. 8: 4, 5. O Jesus Hasomani >>
4. Songon hasomannami, urupi hanai on:
Bai hasosakannami, na i dunia on.
5. Parorot Ham hanami, na dob jabolon-Mu
Ampa hasomannami, sai ondos ma Bamu.

Advertisements