6 Januari: Tingki galek uhurta, galek haporsayaonta

tnt_jan6_mat12_20

 

Arung-arung na marosak seng iponggolhon. (Mateus 12:20)

Roh do martorap na mahol pingkironta, pala jut uhurta, pala songon na marosak uhurta ibagas. Martonggo hita bani Naibata naahap songon na so tolpus, songon na so martarima tonggonta, galek uhurta galek haporsayaonta, songon na ganggang hita humbani Naibata, songon na so tarpaturei Naibata be hita, ninuhurta, songon na sompit uhurta.

Tapi ulang lupa ham, na bayak do Naibata bani holong ni atei pakon idop ni uhur. Tuhan Jesus do siurupi na hurangan, sipargogohi na galek, sipaluah na tarsosak. Ia do marbagahkon : “Arung-arung na marosak seng iponggolhon”. Tapi ipatorsa do uhur na dob maseda. Ai do horja-Ni mangindahi pakon pagoluhkon na dob magou, Ia do margogohi pakon patogarhon na galek.

Halani ai dohori ham ma Tuhan Jesus Sipaluah in. Pindo ham ma humbani haluahon humbani pusok ni uhur, ai ase ipaulak malas ni uhurmu. Sihap do Tuhanta mangurupi ham. Ipabayu uhurmu ase boi mamuji pakon pasangapkon goranni. Arung-arung na marosak ai, na songon gambaran ni uhur na marosak ai ma.

Ingatonta ma ai ase ulang mandolei uhurta sanggah dong roh haboratan banta, sanggah roh hasunsahan manosak hita. Uhurta na borat ai, na sunsah ai na sosak ai, ompaskon hita ma bani Tuhanta. Tenger ma uhurta, ihaholongi do hita, ihargai do hita, na dob hinopkop-Ni.

 

Ham Tuhan Jesus! Hupuji ma Ham halani idop ni uhur-Mu pakon holong-Mu. Bere Ham ma bangku idop ni uhurmu, ase marmalas ni uhur ahu pasangapkon goranmu. Amen.

Haleluya No. 134 :1, 2. Ambit Lang Ham Rupeihu >>
1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.
2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.