9 Januari: Haliharon binibahon ni Jesus

tnt_9jan

 

Domma hubahen ho homa gabe haliharon bani bangsa sipajuh begu-begu gabe parhitean ni hatuahon-Ku ho das hu ujung ni tanoh on. (Jesaya 49: 6)

Holong uhur ni Naibata seng pulou dompak sada jolma atap dompak sada bangsa. Ihamkam holong-Ni do das hu ujung ni tanoh on, ihamkam holongni do sagala jolma pakon sagala bangsa na i dunia on. Nini dompak Anakni ai: Maetektu do ai huahap anggo juak-juakku hansa ho pajongjong morga in Jakob pakon mambobahon mulak sagala na tading humbani morga ni Israel “domma hubahen ho homa gabe” (ayat na iatas in).

Aha ma nani halani ase ihaholongi Naibata ampa bangsa sipajuh begu-begu? Gabe dos pakon bangsa pinilih-Ni? Sedo halani bangsa sipajuh begu-begu atap halani jolma tapi halani hadirion ni Naibata do na mangkaholongi haganup, maidop do uhur-Ni mangidah jolma haganupan.

Tuhan Jesus gabe haliharon bani sipajuh begu-begu. Ambilan na madear pasal Tuhan Jesus Kristus mambahen malas ni uhur bani buei halak. Sonai do bani bangsanta, sonai do bani bangsa na legan i dunia on. Bangsa na ibagas hagolapan, Tuhan Jesus ma gabe haliharon bani bangsa in gabe hatuahon. Banta hatuahon ai rarat humbani bangsa nasada hubani bangsa na legan. Sonai do ronsi sadari on. Ningon sar Ambilan na Madear pasal Tuhan Jesus das hu ujung ni tanoh on.

Idingat Naibata do ganup bangsa, ganup halak, ham pakon ahu. Holong tumang atei ni Naibata ididah do dousa pakon hagolapan na masa banta. Sihol ma jaloonta Jesus gabe haliharon banta, sihol bayak hita bani haliharon binoan ni Tuhan Jesus.

 

Ham Tuhan Naibata! Domma dihut hape hanami ihamkam holong ni ateimu, sai targambar ma ai bannami. Sai marsinalsal ma holong-Mu ibagas uhurnami. Amen.

Haleluya No. 143 : 1, 2. O Tonduy na Manggoki Uhur >>
1. O Tonduy na manggoki uhur, ni saksi-saksi na parlobei in,
Seng ongga-ongga marnamundur, mangimbang munsuh ni Tuhanta in
Puhoi pakon uhur nami on mandodingkon
2 . Andohar apuy-Mu ma gara, marlintun bani bangsa haganup,
Jahowa, Ham paingkat halak na bujur mangkatahon hata-Mu,
Kawahkon Ham bolag sabion in, jabolon-Mu seng piga ope in.

Advertisements