30 Juli: Titah atap Harosuh ni Naibata?

tnt_jul30a_goluhnabaru

 

“Ase hita na dob ipintori marhitei haporsayaon, domma mardamei hita pakon Naibata marhiteihon Tuhanta Jesus Kristus”. (Roma 5 : 1)

Anggo iuji hita sihol mandalankon harosuh ni Naibata ibagas horja na madear, iahap hita do hahuranganta, ai sai marsaor dousa do haganup. Ase bani hita pardousa on, seng dong be dalan na legan sobali porsaya bani Jesus Kristus.

Anggo nairikkon ma Tuhan Jesus, lang pala be nadalankon titah ni Naibata?

Sasintongni lang pala be. Ai nanidok ni titah ai mandalankon harosuh ni Naibata do. Marhitei haporsayaon bani Jesus Kristus, salih do hita gabe anak ni Naibata, na mandalankon harosuh ni Naibata, sedo sinuruh ni titah, tapi sinuruh ni uhur ni Anak ai do.

Marhitei goluh na baru na mangirikkon Tuhan Jesus, gabe marguru bani Tonduy ma hita marparlahou, lang be marguru bani daging. Ai ibere Tuhanta do banta uhur pakon Tonduy na bani, ibere homa gogoh mangimbang na jahat janah manggoluh ibagas haborsihon.

Dousanta do mambahen marsirang hita pakon Naibata. Dob isasap Tuhan Jesus dousanta, dob ipaluah hita humbani jajahan ni sibolis, mardomu ma hita pakon Naibata marhitei Tuhan Jesus, iahap uhurta ma ai ibagas haporsayaon. Hapintoron ni Tuhan Jesus dihut ma gabe hapintoronta, ai ma itangkap haporsayaonta. Jolma na pintor ai lang be marmunsuh pakon Naibata, tapi mardamei ma. Lang mabiar be mandohori Naibata, tapi malas ma uhurni bani Naibata.

Na porlu banta, ai ma mangkaporsayai Tuhan Jesus Kristus, Anak ni Naibata, na dob matei mangkopkop hita ase gabe pintor hita. Pindoonta ma bani Naibata ase isasap dousanta janah iahap hita na dob sasap dousanta marhitei pangkopkopon ni Tuhan Jesus Kristus. Haporsayaon bani Naibata, haporsayaon bani Jesus Kristus, ningon hibul do ai, ulang dong manlembang. Ulang be dong hatengeran ni uhurta age aha pe sobali Naibata pakon Tuhan Jesus Kristus.

Ham Tuhan Naibata! Urupi Ham ma ahu ase totap porsaya ahu bani Anakmu Jesus Kristus na mangkopkop ahu, ase torus mardamei ahu pakon Ham sonai dompak hasoman jolma. Amen.

Haleluya No. 19 :1, 3: Damei do Nimu Bereon >>

1. Damei do nimu bereon, Jesus bani bangsa-Mu,
Tonduy-Mu do pasaudkon, hata bai jabolon-Mu,
Na doyuk janah masombuh, au seng patut rongkon Ham
Tonduy Na Pansing ma suruh ‘se gogoh manombah Ham.
3. Sada horjaonkon nami, ipindo uhur-Mu in;
Ningon holong atei nami, bai hasomannami in
Ase roh ma gogohnami, mangkorjahon hata-Mu.
Mangkahulhon diri nami bai hasoman ‘pa Bamu.

31 Juli: Titah atap Harosuh ni Naibata? (2) >>

<< 29 Juli: Lobih humbani hapintoron ni Parisei

tnt160730

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s