27 Juni: Marnalang Diri Mangihutkon Tuhan

tnt_juni27_parlajouan_hapansingon.jpg

 

“Ia dong na sihol mangihutkon Ahu, iparnalang ma dirini, iporsan ma ari-ari hayu silang laho mangihutkon Ahu”. (Lukas 9: 23)

Sonai ma homa hata ni Tuhan Jesus banta: Marnalang diri janah mangirikkon-Si. Artini, uhur-Ni ma na saud, lang be uhurta. Age sanggah roh banta sitaronon ningon pag hita mangkatahon: Uhur-Mu ma na saud.

Sedo na marnasaja uhurta ijai lang, na mangkawah do hita dompak Naibata janah mangkatahon: “Ham Naibata hubotoh holong do uhur-Mu bangku janah ibotoh Ham do aha na dear bangku”. Jalo hita ma sitaronon atap pusok ni uhur ai songon hun tangan ni Naibata. Sai ibere Naibata ma idop ni uhur-Ni banta, ase tong iahap hita na maidop do uhur-Ni banta age ibagas sitaronon hita. Porsanonta ma silangta ibagas unduk ni uhur: “Sedo guru bangku tapi guru Bamu do”, ai ma tonggonta.

Ra do pusok ni uhur banggal roh bamu, atap tibal mando ham i podomanmu boritan, janah ipindo ham hamalumon, tapi seng mamintor malum. Ingat ham ma, idilo do ham mamorsan silang ari-ari. Boi ma ham martonggo sonon: “Tuhan Naibata, pusok ni uhur na roh hu bangku, na humba-Mu do ai huahap, ai ibagas botoh-Mu do ganupan. Anggo mamingon tarononku do sonon, bere Ham ma bangku sabar ni uhur pakon gogoh laho manaron on lanjar paimahon panorang-Mu mangurupi ahu”. Amen.

Buei do na bani parlajoan ibagas goluh on banta, mangkatahon sonon: Mase ma nani pala sonon borat ni sitarononku ibahen Naibata? Ulang roh uhurmu mangkatahon sonai, ai dong do silangta ari-ari itongos Naibata Bapanta na i nagoriatas ai sadokah ijon ope hita, ai marhitei ai das do hita bani hapansingon.

Unduk ni uhur manaron sitaronon na pinasogop ni Naibanta hu banta, dihut do ai sada tanda na mangirikkon Tuhan Jesus hita, ai Tuhanta pe ipindo do ase isalpuhon Naibata panginuman ai humbani (aima sitaronon ai), tapi nini do homa: “tapi sedo guru bangku Bamu do”.

Ningon irikkonkonta do Tuhanta marunduk ni uhur, age ibagas sitaronon na borat.

 

Ham Tuhan Naibata! Urupi ham ma ahu marnalang diringku. Urupi Ham ma ahu pagomgomkon rosuhku bani rosuh-Mu, age pe suhar huahap. Amen.

Haleluya No. 154:1,2,4: Marsipota pe Idahon >>

1. Marsipota pe idahon, hita songon tinadingkon
Ni Tuhanta Bapa in, sedo na tongon sonin
2. ‘Ge malambat pe sipota pangurupi ni Tuhanta,
anggo roh panorangnin, mintor tongoson-Ni in.
4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.

28 Juni: Haganup do Hita Iontang >>

<< 26 Juni: Pasu-pasu Marhitei Sitaronon?

tnt160627

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s