29 Juni: “Hape Marsidalian Bei do Sidea”

tnt_jun29

 

“Roh ma nasiam ai domma sirsir haganupan! Hape rap marsidalian bei do sidea haganupan”. (Lukas 14: 17,18)

Dalan mulak bani Naibata domma ibuha banta. Domma iontang hita ase roh hu Bani, mardamei janah marmalas ni uhur.
Ai lang dihut do ham na dob manjalo ontangan ni Naibata? Dihut do ham rap pakon hasoman na mambalosi ontangan ai, atap masuk do ham bani halak na so mambalosi ontangan ai? Atap masuk do ham bani na so ra roh bani ontangan ai?

Ibasa hita bagei do sidalian ni sidea. Seng dong panorangku sonari, hupaima lah lobei dob matua, atap boritan atap malele matei ase marugama. Roh pe use, sonari lape panorangni.

Masuk do ham nani bani na marsidalian ai?

Ra do lang ninuhurmu. Tapi anggo roh golpa-golpa ni Naibata bamu, hape seng ihartuk ope uhurmu, dos do ai na so saud do ai tong mambalosi ontangan ni Naibata. Tapi ulang hampung uhurmu pasal ai, ai roh do uhum ni Naibata mangkatahon: “Seng malo daion ni na huontang ondi sipanganon na hutagang on”. Ipio ma na legan hu bani pesta ai, tading ma ham.

Halani ai iontang do ham use: Hatuahon domma tagang, bamu, mardomu pakon Naibata janah marmalas ni uhur ibagas Tonduy na Pansing, gabe anak ni Naibata ma ham anggo ibalosi ham ontangan ni Naibata. Ulang ham ra ilanglangi horjamu atap pansarianmu, mansarihon goluh on. Ai dong do lalab horja, dong do lalab sisarionkon anggo seng nainggani. Na patut do nainggani ganupan ai anggo roh pio-pio ni Naibata banta, ai ise use marpio ham ase ra ham manadingkon horjamu? Suratkon ham hubagas uhurmu on: Domma matei Tuhan Jesus halani dousangku. Roh ma ham paima salpu panorang-Ni. Domma sirsir damei pakon malas ni uhur, ganup tene domma sirsir, ipasirsir Naibata.

Seng tarsibar hosah, atap sadihari roh pangalop ni Naibata banta ase anggo iahap ham ma roh ontangan ni Naibata bamu, ulang be ham marpatar-patar. Jolom ham poltik surat undangan ai. Ase anggo roh pandilo-Ni bamu hun dunia on masuk nari ham hu lambung ni Naibata.

 

Tarima kasih ma Bamu Naibata halani iontang Ham banami pardousa on hu bani malas ni uhur banggal na ilobeiMu. Amen.

Haleluya No. 142: 3.4: Buei Ope na Siat In >>

3. Pardousa ho, ninuhurmin, na so talup be dihut?
Na dong halani dousamin mambaen na sundat bongkot.
Ai domma sahei dousamin igalar-Tuhan Jesus in.
Sahei, sahei , salosei utangmin ,
4. Haporsayai ma Hata in, ai in do haluahon.
Arapkon Tuhan Jesus in, daroh-Ni in ma jolom.
Age gok dou sa uhurmin, maluah do bahenon-Nin.
Tongon, tongon, maluah baenon-Nin.

Juni 30: “… ipatalar Ia, ase ibuat dousanta” >>

<< Juni 28: Haganup do Hita Iontang

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s