10 Maret: “Laho ma ho bolis!”

tnt_mar10.jpg

 

Ai tarsurat do Tuhan Naibata do sisombahonmu, sahalaksi do sibalosanmu. (Matius 4:10)

Dob iulakkon sibolis ai mambobai Jesus hu pakpak ni dolog na gijang tumang, ipatuduhkon ma hu Bani haganupan harajaon ni dunia on pakon hinajengesni. Dob ai nini ma dompak Tuhan Jesus: Haganupan in huberehon bamu anggo ra ham manrogop manombah ahu. Dob ai ihatahon Tuhan Jesus ma dompaksi: Laho ma ho bolis! Ai tarsurat do Tuhan Naibata do sisombahonmu, sahalaksi do sibalosanmu! Dob ai itadingkon sibolis ai ma Ia. Jadi buei ma roh malekat marugas Bani.

Buei tumang do na talu ibahen sibolis dob ipatidak hinajenges ni arta na i dunia on. Ibagas na mangayaki hinajenges ni arta ai jolma, deba lang be dong panorang mardingat Naibata, arta ai mando ipardakdak. Magou ma pardomuanni pakon Naibata, magou ma damei ni uhurni. Sonai do homa na mangayaki kuasa, dompak jai ma uhurni pakon langkahni magou ma pardomuan pakon Naibata.

Anggo ibere Naibata kuasa pakon habayakon bamu, dear pakei ham ai romban bani harosuh ni Naibata, ibagas kuasamu ai pakon habayakonmu ai ma ham mardomu pakon Naibata. Marbuah antang-anting marsilangkoplangkopan, buei pe hata mantin sedo ganup balosan, nini umpasa. Gati do anggo palobei mantin paet do hadobanni. Sonai do sagala parlajoan.

Suharni ai do: Age pe mahol age pe ngalut mandalankon pardomuanta hubani Naibata, tapi mantin do hadobanni, domma ihaporsayai hita ai. Ia roh banta parlajoan, usihi hita ma Tuhanta lang marsahap na ganjang Tuhanta, tapi ihatahon: Laho ma ho bolis!

Anggo si Hawa iharosuhkon do marbual-bual pakon sibolis ai, dobni talu ma ia. Hata mangusir ai ma pakeonta. Porlu homa naahap sonaha alusni parroh ni sibolis ai. Laho ma ho hu pudingku bolis, nini Tuhan Jesus dompak si Petrus (Mat. 16:23), dob ibahen susian ai parsangsian bani Tuhan Jesus.

 

Ham Tuhan Jesus! Urupi Ham ma ahu mamakei Hatamu mangusir sibolis, na roh manlajou ahu. Amen.

Haleluya No. 107 : 5, 6. Irikkon Nasiam ma Au >>
5. Seng na tarbaen hanami in, ipingkir uhurnima;
Ulang mabiar halanin, Au do hasomannima.
taluhonon-Ku munsuh in, tenger uhurmu pasal in.
6. Na manghargahon hosahnin, in do mansedahonsi;
Sagala na marnalang in, in do pagoluhkonsi.
Na so mamorsan silang in, na so talup be Bangku in.