11 Maret: Sora ni Sibolis…. atap Harosuh ni Naibata?!

tnt_mar11_sorani sibolis

 

Iramotkon Naibata ma ham Tuhan, ulang masa ai Bamu! (Matius 16:22)
(Terjemahan baru, LAI 1976, “Idop ma uhur ni Naibata Bamu, Tuhan! Ulang ma masa ai Bamu”!)

Golap do sidalanan ni Tuhan Jesus, ai maningon idalani sitaronon pakon hamatean. Tapi harosuh ni Naibata do dalan ai, janah ra do Tuhan Jesus mandalani dalan ai ase saud harosuh ni Naibata. Ibotoh do, na mamontas dalan ai sunsah anjaha borat do, tapi seng ai manundati Tuhan Jesus mandalankon harosuh ni Naibata.

Itaron pe ai haganupan mambahen hatuahonta do, na dob itotapkon Naibata. Tapi sibolis na magigi mangidah hasonanganta, ai ma munsuh satua ni jolma pakon Naibata, iuji ma manundati hatuahonta ai. Marsahap ma ia marhitei pamangan ni si Petrus: “lramotkon Naibata ma Ham Tuhan, ulang ma masa ai Bamu!”, nini. Artini: Lang pala maningon matei Ham ase maluah jolma, manaron pala sonai marsikni.

Alus do dalan ai, humbani susian haholongan ni Tuhan Jesus. Alus do hata ai, hata mangapiti do iluarhon si Petrus.

Sisonon ma porlu alus homa pangahapta songon Tuhan Jesus. Na dohor bamu, na sangkan banta do manluarhon bujur ni uhurni tangaron, janah songon na mangapiti hita, hape laho manlanggar hata ni Naibata do.

Ingat ham, sanggah sonai sebe sindohorta ai, tapi sibolis do. Anggo ibogei ham age hata ni sindohormu, songon na mangapiti hita tangaron, tapi manlanggar hata ni Naibata, botoh ham ma sibolis do ai, usir ham ma, songon binahen ni Tuhan Jesus.

Halani si pindoonta do gogoh humbani Naibata ampa torang ni uhur, ase tangkas itanda hita sora ni sibolis, ia sonaha pe alusni, ase mintor ilawan hita. Ipalihar Tuhanta ma uhurta manangihon hatani ampa sorani, ase ibotoh hita siihutonkonta. Pindoonta homa gogoh, ase margogoh hita, mandalankon harosuh ni Naibata janah manlawan dirinta.

Ham Tuhan Naibata! Urupi Ham ma hanami ase ulang iapiti hanami dirinami, sai ra ma hanami mangihutkon dalan na dob pinatuduhkonmu. Amen.

Haleluya No. 64 : 3. Laho do Biri-biri in >>
3. Na ra do au alo Bapa, humbai gok ni uhurhu.
Padas rosuh-Mu, ‘ge huja, ai gok Bamu tumang do”.
O holong ni atei-Mu in, tor aha ma usihannin
na songon Ham margogoh? Ibere Naibata hape,
Anak-Ni lao manaron in, taronon ni na magou.