14 Maret: Ulang Mangunsandei Bani Dirinta

tnt_mar14_mangunsadeibainaibata.jpg

 

Tapi nini si Petrus ma marsampang: “Age sangsi sidea ganup anggo ahu lanjar do seng sangsi” (Mateus 26:33)

Nini Tuhan Jesus dompak sidea: Gabe sangsi do hanima ganupan mangidah ahu saborngin on. Ayat na tarsurat i atas in ma sampang ni si Petrus. Jadi Tuhan Jesus ma dompak si Petrus: Nasintong do hatangkon bam: “Saborngin on, paima tahuak dayok domma tolu hali Ahu pamalangonmu”. Jadi nini si Petrus ma marbalos: “Matei pe ahu rap pakon Ham seng anjai parnalangonku Ham”.

Tenger do uhur ni si Petrus bani dirini ronsi gogohni mangkaholongi Tuhan Jesus, guruni ai. Tapi aha do na masa bani halak na martenger ni uhur bani dirini ai? Saud do ia rap matei pakon Guruni ai?

Seng tarsuhunisi bagah-bagahni. Dob roh na manungkunsi bornginni ai, iparnalang do Tuhan Jesus: “Seng hubotoh aha hinatahonmu ai”. Tongkin nari roh ma use sada naboru mangkatahon: “Tongon do hasoman ni Jesus na hun Nasaret an do halak on”. Iulakkon ma mamorsou, nini marhasoman bija: “Seng hutanda halak ai”.

Sonai ma pardabuh ni si Petrus. Sonai do buei pardabuh ni Kristen. Atok do Ia bani totap ni holongni bani Tuhan Jesus, nini ibagas uhurni: Domma buei hutaluhon parlajoan, seng dihut be bangku lumba-lumba ai, bani na legan mando ai.

Ingat hita ma hata ni Apostel Paulus: Na mangkatahon jongjong ia ninuhurni, pangkei ma ia ase ulang tompas (1 Kor. 10:12). Lang boi mangunsandei hita bani dirinta na galek on. Anggo sonai tarbador ma hadobanni. Mangunsandei ma hita bani gogoh ni Tuhan Jesus, ase monang hita torus.

 
Ham Tuhan Jesus! Halak na galek do hanami, tapi na gogoh do Ham. Bere Ham ma gogoh na humbamu bannami na galek on. Sai gogoh na hum Bamu ma pangunsagaonkonnami bani panorang panlajoan. Amen.

Haleluya No. 119 :1, 2. Bintang Pambobai >>
1. Bintang Pambobai Batu Gingging in
Tungkot sijolomon bai na landit in
Ruti hagoluhan bah na torsuk in
Alat situjuan in ma Jesus in.
Alat situjuan in ma Jesus in.
2. Ham tongon gogohku, pangajamankin,
damei ni uhur-Mu, hasonangankin
Goluh ni tonduyhu, hatuahonkin,
in ma alo Tuhan; Ham tumang do in.
in ma alo Tuhan; Ham tumang do in.

Advertisements