18 Maret: Sonaha, otik do holong ni uhurmu bani Jesus?

tnt_mar18_holong_luk7_47b.jpg

 

“Tapi anggo otik do isasap dousa ni halak, otik do holong ni uhurni”. (Lukas 7: 47b)

Terjemahan baru, LAI 1976, “Halak na otik hona sasap dousani, otik do holong ni uhurni”).
Si Simon Parise ai pe ni uhur domma manjalo partolongan Tuhan Jesus pasal dousa na etek, na mambahen ham ni uhurni. Iurupi do ia songon halak na legan na roh mamboan dousani hu Bani. Taridah do porlu do uhurni ase dihut Tuhan Jesus roh hu rumahni, ai ma ase dihut Tuhan Jesus iontang.

Panjaloon bani Tuhan Jesus pe iahap hurang do marimbang adat hasomalan bani Jahudi: Seng itagang bah pamurihi naheini, seng Ia isummah, halani otik do iahap tartolong ia, holongni pe otik do. Ai do ase hurang sonang uhurni mangidah naboru na masuk hu parmanganan ai, na sihol pajumpah pakon Jesus, ai ma se roh bungbang ni uhurni atap na tongon nabi Tuhan Jesus atap lang, ai jolma jalang do naboru ai ibotoh parhuta ai, hape ipaturut Tuhan Jesus.

Sonaha, songon si Simon do ham? Otik do holong ni uhurmu bani Tuhan Jesus?

Ningon iahap hita do partolongan banggal na binahen ni Tuhan Jesus, na manasap dousanta na buei in, na banggal in. Anggo sonai banggal ma holong ni uhurta Bani. Sai sihol pajumpah ma hita pakon-Si songon naboru ai, janah seng be mangkawah hita hu siamun sambilou, torus mando dompak Tuhanta Jesus. Seng langlang be hita atap halani an atap halani on. Ambah ni ai dong ma sura-suranta sibereonta bani Tuhanta tanda tarima kasih ni uhurta, minak na misbou.

Boan ham ma ganup dousamu hu Bani, tangiskon ham. Jadi dihut ma bamu ihatahon Tuhanta hata na mantin ai: “Haporsayaonmu do na pagoluh ho mardamei ma ho mulak”. Pindoonta ma hu Bani ase lambin itanda hita holong ni Tuhanta hu banta ase lambin holong ateita Bani.

 

Ham Tuhan Jesus! Ajari Ham ma ahu mananda dousangku pakon mangindo pangurupimu manasap dousangku na banggal in. Amen.

Haleluya No. 152: 1,2. Na Sonang Au Dob na Mar Tuhan Au >>
1. Na sonang au dob na mar Tuhan au bai Tuhan Jesus in.
Ai lang be dong dob jabolon-Ni au sihoruonkonkin.
Ai Ia mado huirikkon, dunia on ma hutundalhon,
Sonang ma au! Sonang ma au!
2. Sonang ma au, ai mambur do hape pusokni uhurhin.
Megah ma au ronsi antigan pe iapoh Jesuskin.
Seng huhoruhon be goluhku, ganup do guru bai Bapangku.
Seng ma au! Sonang ma au!

Advertisements